افغان شہریوں کی وطن واپسی کے لیے طورخم سرحد کھل گئی

طورخم: پاک افغان کشیدگی کے باعث 20 روز سے بند طورخم سرحدی گزرگاہ کو غیر قانونی افغان شہریوں کی واپسی کے لیے دوبارہ کھول دیا گیا۔

ضلع خیبر کے ڈپٹی کمشنر بلال شاہد کے مطابق سرحدی گزرگاہ صرف غیر قانونی طور پر مقیم افغان شہریوں کی بے دخلی کے لیے کھولی گئی ہے، جبکہ تجارت اور پیدل آمدورفت بدستور بند رہے گی۔

انہوں نے بتایا کہ سینکڑوں افغان پناہ گزین اپنے وطن واپسی کے لیے طورخم امیگریشن سینٹر پہنچ گئے ہیں، جہاں ضروری کارروائی کے بعد انہیں افغانستان جانے کی اجازت دی جا رہی ہے۔

خیال رہے کہ 11 اکتوبر کو پاک افغان کشیدگی کے باعث طورخم سرحد ہر قسم کی آمدورفت کے لیے بند کی گئی تھی۔

اقوامِ متحدہ کے ادارہ برائے پناہ گزین (یو این ایچ سی آر) کے مطابق 8 اکتوبر تک مجموعی طور پر 6 لاکھ 15 ہزار غیر قانونی افغان شہریوں کو پاکستان سے طورخم کے راستے واپس بھیجا جا چکا ہے۔