پنجاب بلدیاتی انتخابات کی تیاریوں میں تاخیر،چیف الیکشن کمشنرکاسخت پیغام

اسلام آباد: چیف الیکشن کمشنر سکندر سلطان راجہ نے پنجاب حکومت پر زور دیا ہے کہ وہ صوبے میں بلدیاتی انتخابات کے انعقاد کی اپنی آئینی ذمہ داری پوری کرے۔

بلدیاتی انتخابات کے معاملے پر چیف الیکشن کمشنر کی زیرِ صدارت اجلاس ہوا جس میں پنجاب کے اعلیٰ حکام نے شرکت کی۔ اجلاس کے دوران سکندر سلطان راجہ نے کہا کہ الیکشن کمیشن کو بروقت حلقہ بندی کے لیے ضروری رولز، ڈیٹا اور نقشے فراہم کیے جائیں تاکہ انتخابی شیڈول طے کیا جا سکے۔

چیف سیکرٹری پنجاب نے اجلاس کو بتایا کہ لوکل گورنمنٹ الیکشن رولز کا مسودہ 15 نومبر تک الیکشن کمیشن کو بھجوا دیا جائے گا۔ انہوں نے مزید کہا کہ درجہ بندی کے نوٹیفکیشن 22 دسمبر، یونین کونسلز کی تعداد کے نوٹیفکیشن 31 دسمبر تک اور تمام نقشے 10 جنوری تک فراہم کر دیے جائیں گے۔

ذرائع کے مطابق الیکشن کمیشن ان تاریخوں کے بعد پنجاب میں بلدیاتی انتخابات کی حتمی تیاریوں کا آغاز کرے گا۔