آزاد، باخبر صحافت کسی بھی جمہوری معاشرے کی بنیاد ہوتی ہے،وزیراعظم

وزیراعظم شہباز شریف نے کہا ہے کہ آزاد، باخبر اور ذمہ دار صحافت کسی بھی جمہوری معاشرے کی بنیاد ہوتی ہے، صحافیوں کے خلاف تشدد یا انتقامی کارروائیاں آزادی اظہار پر حملہ ہیں۔

صحافیوں کے خلاف جرائم کے خاتمے کے عالمی دن کے موقع پر اپنے پیغام میں وزیراعظم نے کہا کہ صحافی عوام کو حقائق تک رسائی فراہم کرتے ہیں اور سچائی کے علمبردار ہیں، ان کے خلاف ہونے والے جرائم ناقابلِ قبول ہیں۔

انہوں نے کہا کہ حکومت پاکستان آزادی صحافت کے تحفظ اور صحافیوں کو محفوظ ماحول فراہم کرنے کے لیے پرعزم ہے۔ ایسے تمام اقدامات کیے جائیں گے جن سے صحافیوں کے خلاف جرائم کی شفاف تفتیش، انصاف کی فراہمی اور مجرموں کے خلاف قانونی کارروائی ممکن ہو۔

شہباز شریف نے ان تمام صحافیوں کو خراجِ تحسین پیش کیا جنہوں نے حق و سچ کی خاطر مشکلات برداشت کیں، اور اُن اہلِ قلم و میڈیا ورکرز کے اہلِ خانہ سے اظہارِ یکجہتی کیا جنہوں نے اپنے پیاروں کو فرضِ منصبی کے دوران کھو دیا۔

وزیراعظم نے بین الاقوامی برادری، میڈیا اداروں اور سول سوسائٹی سے اپیل کی کہ وہ صحافیوں کے تحفظ اور اظہارِ رائے کی آزادی کے فروغ کے لیے اپنا کردار ادا کریں، کیونکہ آزاد صحافت ایک مضبوط اور جمہوری پاکستان کی ضمانت ہے۔