وزیراعظم آزادکشمیر کیخلاف تحریک عدم اعتماد کب پیش ہوگی؟

آزاد کشمیر کے وزیر قانون میاں عبدالوحید نے کہا ہے کہ وزیراعظم چوہدری انوارالحق کے خلاف تحریک عدم اعتماد ایک ہفتے کے اندر پیش کر دی جائے گی۔

نجی ٹی وی سے گفتگو کرتے ہوئے وزیر قانون نے بتایا کہ نئی حکومت کو درپیش چیلنجز سے نمٹنے کے لیے اسٹیک ہولڈرز سے مشاورت ہو رہی تھی، جس کی وجہ سے تحریک پیش کرنے میں تاخیر ہوئی۔ انہوں نے مزید کہا کہ تحریک عدم اعتماد کا طریقہ کار طے پا گیا ہے اور جلد پیش کر دی جائے گی۔

ذرائع کے مطابق بیرسٹر سلطان محمود کے حمایت یافتہ اراکین کی پیپلز پارٹی میں شمولیت کے بعد قانون ساز اسمبلی میں پیپلز پارٹی کے ممبران کی تعداد 27 ہو گئی ہے۔ بلاول بھٹو زرداری ہی تحریک عدم اعتماد پیش کرنے کے حوالے سے حتمی فیصلہ کریں گے۔

یاد رہے کہ مسلم لیگ ن اور پیپلز پارٹی نے وزیراعظم چوہدری انوارالحق کے خلاف تحریک عدم اعتماد پیش کرنے پر اتفاق کیا ہے۔ تاہم ن لیگ نے فیصلہ کیا ہے کہ وہ حکومت سازی میں پیپلز پارٹی کا ساتھ نہیں دے گی اور اپوزیشن میں رہے گی، جبکہ پیپلز پارٹی کے پاس اگر مطلوبہ اراکین کی تعداد پوری ہے تو وہ حکومت بنانے کی اہلیت رکھتی ہے۔