ہتک عزت دعویٰ ؛وفاقی وزیر اطلاعات عطا اللہ تارڑ کا بطور گواہ بیان قلمبند

لاہور: سیشن کورٹ لاہور میں وزیراعظم شہبازشریف کے بانی پی ٹی آئی کے خلاف ہتک عزت دعویٰ پر سماعت  کے دوران وفاقی وزیر اطلاعات عطا اللہ تارڑنے  بطور گواہ بیان قلمبند کرا دیا۔

نجی ٹی وی چینل کے مطابق سیشن کورٹ لاہور میں وزیراعظم شہبازشریف کے بانی پی ٹی آئی کے خلاف ہتک عزت دعویٰ پر سماعت ہوئی،وفاقی وزیر اطلاعات عطا اللہ تارڑ بطور گواہ سیشن کورٹ میں پیش ہوئے،عدالت نے عطا اللہ تارڑ کو بیان قلمبند کروانے کی ہدایت کی۔

عطا اللہ تارڑ نے کہاکہ وزیراعظم کی سیاسی و سماجی خدمات پوری دنیا جانتی ہے،نجی ٹی وی پروگرام میں مدعی پر جھوٹے، من گھڑت الزامات لگائے گئے،کہا گیا پاناما لیکس کو واپس لینے کے حوالے سے 10ارب روپے کی پیش کش کی گئی۔

عدالت نے استفسار کیا کہ جس نے ٹرانسکرپٹ بنایا وہ کہاں ہے؟معاون وکیل شہبازشریف نے کہاکہ بیان حلفی موجود ہے، عدالت میں پیش کیا جائے گا، عطا تارڑ نے کہاکہ تقریبات، جلسے، عوامی اجتماع میں الزامات کو دہرایاگیا۔

وکیل بانی پی ٹی آئی نے پیش کردہ ریکارڈ قبول کرنے پر اعتراض کردیا،وکیل بانی پی ٹی آئی نے کہاکہ ویڈیوز گواہ کی ملکیت ہیں نہ گواہ نے ریکارڈ کیں،اخباری تراشتے گواہ سے متعلقہ نہیں، بیان میں پیش نہیں کئے جاسکتے۔عدالت نے تمام دستاویزات ایک بار جمع کرانے کی ہدایت  کی۔