محسن نقوی کا نادرا اور پاسپورٹ آفس کا اچانک دورہ

لاہور: وفاقی وزیر داخلہ محسن نقوی نے فہد ٹاؤن میں نادرا سینٹر اور ڈیرہ گجراں شالیمار میں ریجنل پاسپورٹ آفس کا غیر اعلانیہ دورہ کیا۔

دورے کے دوران وزیر داخلہ نے شناختی کارڈ، دیگر دستاویزات اور پاسپورٹ کے اجرا کے عمل کا جائزہ لیا اور موقع پر شہریوں سے ملاقات کر کے ان کے مسائل سنے۔

محسن نقوی نے شہریوں کی شکایات کے فوری ازالے کے احکامات جاری کیے۔ ایک بزرگ خاتون کی وہیل چیئر پر موجودگی کے پیش نظر انہوں نے عملے کو ان کی دستاویزات فوری طور پر پراسیس کرنے کی خصوصی ہدایت دی۔

وفاقی وزیر داخلہ نے کہا کہ خصوصی افراد کے کام کو ترجیحی بنیادوں پر نمٹایا جائے اور انہیں مکمل سہولت فراہم کی جائے۔

شہریوں نے بتایا کہ پاسپورٹ کے اجرا میں زیادہ انتظار نہیں کرنا پڑتا اور عملے کا رویہ اطمینان بخش ہے۔

محسن نقوی نے متعلقہ افسران کو ہدایت کی کہ نادرا اور پاسپورٹ دفاتر میں آنے والے ہر شہری کا کام طے شدہ وقت میں مکمل کیا جائے اور شناختی دستاویزات کی ترسیل مقررہ مدت میں یقینی بنائی جائے۔

انہوں نے کہا کہ شہریوں کو اپنی شناختی دستاویزات کے حصول میں کسی بھی قسم کی دشواری نہیں ہونی چاہیے۔