آذربائیجان کا وکٹری ڈے:وزیراعظم اور فیلڈ مارشل کو خصوصی دعوت

وزیراعظم شہباز شریف اور فیلڈ مارشل جنرل سید عاصم منیر کو آذربائیجان کے صدر الہام علییوف نے وکٹری ڈے پریڈ میں شرکت کی دعوت دی ہے۔ یہ دعوت ٹیلی فونک رابطے کے دوران دی گئی، جس میں دونوں رہنماؤں نے دوطرفہ تعلقات اور اہم سکیورٹی امور پر تبادلہ خیال بھی کیا۔

وزیراعظم شہباز شریف 8 نومبر کو ایک روزہ دورے پر آذربائیجان پہنچیں گے، جہاں وہ فیلڈ مارشل جنرل عاصم منیر کے ہمراہ یوم فتح کی تقریبات میں شریک ہوں گے۔ یوم فتح کی تقریبات میں ترکی کے صدر رجب طیب اردوان بھی شرکت کریں گے، اور یہ تینوں مہمان خصوصی ہوں گے۔

اس موقع پر وزیراعظم شہباز شریف کی آذربائیجان کے صدر الہام علییوف اور دیگر اعلیٰ قیادت سے ملاقاتیں متوقع ہیں۔ سفارتی ذرائع کے مطابق، دورے کے دوران وزیراعظم کی ترکی کے صدر اردوان سے بھی ملاقات ہو سکتی ہے۔

آذربائیجان میں یوم فتح کی تقریبات مقبوضہ نگورنو کاراباخ کی آزادی اور آرمینیا کے خلاف فتح کی مناسبت سے منائی جاتی ہیں۔ اس جنگ کے دوران پاکستان اور ترکی نے بھرپور انداز میں آذربائیجان کی حمایت کی تھی۔