پاکستانی پاسپورٹ کی عالمی رینکنگ میں نمایاں بہتری

اسلام آباد: قومی اسمبلی میں بتایا گیا ہے کہ پاکستانی پاسپورٹ کی عالمی رینکنگ میں نمایاں بہتری آئی ہے اور اب یہ دنیا کے 100 بہترین پاسپورٹس میں شامل ہو چکا ہے۔

وزیر برائے پارلیمانی امور ڈاکٹر طارق فضل چوہدری نے سوالات کے دوران ایوان کو بتایا کہ ہینلی پاسپورٹ انڈیکس 2025 کے مطابق پاکستانی پاسپورٹ کی درجہ بندی میں 20 درجے بہتری ریکارڈ کی گئی ہے۔

انہوں نے کہا کہ پاکستان نے اب تک 50 ممالک کے ساتھ سفارتی اور سرکاری پاسپورٹس کے حامل افراد کے لیے ویزا استثنیٰ معاہدے کیے ہیں جبکہ مزید بہتری کے لیے اقدامات جاری ہیں۔

ڈاکٹر طارق فضل چوہدری نے مزید بتایا کہ تمام جعلی شناختی کارڈز اور پاسپورٹس منسوخ کیے جائیں گے تاکہ نادرا کے ریکارڈ کو شفاف اور محفوظ بنایا جا سکے۔

انہوں نے ایوان کو یہ بھی بتایا کہ اسلام آباد میں 30 مقامات پر عوامی مفت وائی فائی سہولت فراہم کی جا رہی ہے۔
یہ سہولت 15 میٹرو بس اسٹیشنوں کے علاوہ ایف 6 اور ایف 7 مراکز، سی ڈی اے اسپتال، جاپانی پارک، لیک ویو پارک، دامن کوہ، فاطمہ جناح پارک، سنڈے بازار جی 6 اور ایچ 9 میں دستیاب ہوگی۔

وزیر نے مزید کہا کہ وزیراعظم شہباز شریف کی ہدایت پر دارالحکومت کی آئندہ 50 سال کی پانی کی ضروریات پوری کرنے کے لیے وزارت داخلہ کے تحت ایک خصوصی کمیٹی تشکیل دی گئی ہے۔
کمیٹی چراہ ڈیم، شاہدرہ ڈیم، غازی بروتھا اور خان پور ڈیم سے پانی کی فراہمی بڑھانے کے منصوبوں پر کام کر رہی ہے تاکہ اسلام آباد اور راولپنڈی میں پانی کی قلت پر قابو پایا جا سکے۔

مزید برآں، وزیر پارلیمانی امور نے بتایا کہ اسلام آباد میں صفائی کے نظام کے تحت گھریلو فضلہ ایک منظم طریقہ کار کے مطابق اکٹھا اور تلف کیا جا رہا ہے۔

#پاکستانی_پاسپورٹ #ہینلی_انڈیکس #اسلام_آباد #وائی_فائی_سہولت #چراہ_ڈیم #شہباز_شریف