بنوں میں فائرنگ کا تبادلہ، 7 دہشتگرد ہلاک، ایک اہلکار شہید

بنوں کے علاقے تھانہ کینٹ ممند خیل میں پولیس اور دہشتگردوں کے درمیان فائرنگ کے شدید تبادلے میں 7 دہشتگرد ہلاک جبکہ ایک پولیس اہلکار شہید ہو گیا۔ واقعے میں سات اہلکار اور چار شہری زخمی ہوئے۔

ڈی پی او بنوں کے مطابق پولیس اور سی ٹی ڈی کی مشترکہ ٹیم علاقے میں سرچ آپریشن کر رہی تھی کہ دہشتگردوں نے گھات لگا کر فائرنگ شروع کر دی۔ پولیس کی جوابی کارروائی میں سات دہشتگرد ہلاک کر دیے گئے۔

ڈی پی او نے بتایا کہ آپریشن کے دوران پولیس کا ایک اہلکار عابد خان شہید ہوا، جبکہ سات اہلکار زخمی ہوئے۔ فائرنگ کی زد میں آ کر چار شہری بھی زخمی ہوئے جنہیں اسپتال منتقل کر دیا گیا ہے۔

شہید اہلکار کی نمازِ جنازہ پولیس لائنز بنوں میں سرکاری اعزاز کے ساتھ ادا کی گئی۔ پولیس اور قانون نافذ کرنے والے اداروں نے علاقے میں ناکہ بندی مزید سخت کر دی ہے اور دہشتگردوں کے سہولت کاروں کی تلاش کے لیے سرچ آپریشن تیز کر دیا گیا ہے۔