وزیراعلیٰ کا ٹکراؤ خیبر پختونخوا کے مفاد میں نہیں،ایمل ولی

پشاور: عوامی نیشنل پارٹی کے مرکزی صدر ایمل ولی خان نے کہا ہے کہ صوبے کے چیف ایگزیکٹو کا ٹکراؤ کی جانب جانا خیبر پختونخوا کے عوام کے مفاد میں نہیں ہے۔ ایمل ولی نے واضح کیا کہ وزیراعلیٰ کی کرسی پر بیٹھنے والے شخص کی ذمہ داری ہے کہ وہ عوام اور ریاست کے درمیان فاصلے کم کرے اور بداعتمادی ختم کرے۔

انہوں نے کہا کہ اگر حالات اسی طرح برقرار رہے تو صوبے کا مستقبل خطرے میں پڑ سکتا ہے۔ ایمل ولی نے وزیراعلیٰ سے کہا کہ ٹکراؤ کی بجائے آئین و قانون کا راستہ اپنائیں اور صوبے کے لیے مثبت اقدامات کریں۔

دوسری جانب، گورنر خیبر پختونخوا فیصل کریم کنڈی نے بھی اپیل کی کہ وزیراعلیٰ تحمل سے کام لیں اور سیاست کو قومی سلامتی کے اداروں کو کمزور کرنے کا ذریعہ نہ بنایا جائے۔ انہوں نے کہا کہ تمام سیاسی قوتیں دیرپا امن کے لیے مسلح افواج کے ساتھ کھڑی ہونی چاہئیں اور فوج کے عزائم پر سوال اٹھانا عوامی سلامتی کو نقصان پہنچاتا ہے۔