لائن لاسز کی بنیاد پرلوڈشیڈنگ کیخلاف امیرجماعت اسلامی کی درخواست مسترد

کراچی: سندھ ہائیکورٹ نے شہر قائد میں لائن لاسز کی بنیاد پر لوڈشیڈنگ کے خلاف امیر جماعت اسلامی کراچی منعم ظفر کی درخواست ناقابل سماعت قرار دیتے ہوئے مسترد کر دی ہے۔

درخواست گزار کے وکیل نے عدالت کو بتایا کہ لائن لاسز کی بنیاد پر لوڈشیڈنگ غیر قانونی ہے اور طویل بجلی کی بندش سے شہریوں کی زندگی متاثر ہوتی ہے۔

عدالت نے درخواست کو ناقابل سماعت قرار دیتے ہوئے معاملہ نیپرا (نیشنل الیکٹرک پاور ریگولیٹری اتھارٹی) کے پاس بھیجنے کی ہدایت کی۔

سندھ ہائیکورٹ نے کہا کہ نیپرا شکایت موصول ہونے کے ایک ماہ کے اندر فیصلہ کرے اور ایم آئی ٹی 2 میں رپورٹ جمع کروائے۔

عدالت نے مزید کہا کہ سپریم کورٹ کے احکامات کے مطابق لائن لاسز کی بنیاد پر لوڈشیڈنگ کے حوالے سے درخواست قابل سماعت نہیں ہے، جبکہ نیپرا ایکٹ کے سیکشن 39 کے تحت درخواست گزار کو نیپرا سے رجوع کرنے کا حق حاصل ہے۔