افکار اقبال نوجوانوں کیلئے مشعل راہ ہے،محسن نقوی کا یومِ اقبال پر پیغام

اسلام آباد: یومِ اقبال کے موقع پر وفاقی وزیر داخلہ محسن نقوی نے مفکر پاکستان اور شاعر مشرق علامہ محمد اقبالؒ کو خراج عقیدت پیش کیا۔

وزیر داخلہ نے کہا کہ اقبالؒ کی شخصیت اور فکر ایک بے مثال میراث ہے، جس نے مسلمانوں میں خودی اور وقار کا جذبہ بیدار کیا۔ پاکستان اقبال کے خواب کی تعبیر ہے اور اس کی حفاظت ہم سب کی اجتماعی ذمہ داری ہے۔

محسن نقوی نے مزید کہا کہ اقبالؒ کے افکار آج بھی رہنمائی کا سرچشمہ ہیں اور فلسفۂ خودی نے نوجوانوں کو بلند حوصلہ، غیر متزلزل ایمان اور خود اعتمادی عطا کی۔ ان کی شاعری عمل اور فکر کی دعوت دیتی ہے۔

وزیر داخلہ نے کہا کہ ہمیں اقبالؒ کے اصولوں پر عمل کرتے ہوئے پاکستان کی ترقی، اتحاد اور امن کے لیے کوشاں رہنا ہوگا۔ نوجوانوں کے لیے اقبالؒ کے افکار مشعل راہ ہیں، جن کے ذریعے وہ اپنی خودی پہچانیں اور محنت سے ملک کے روشن مستقبل کی تعمیر کریں۔

محسن نقوی نے دعا کی کہ اللہ تعالیٰ ہمیں اقبال کے افکار پر عمل کرنے اور وطن کو ترقی کی بلندیوں تک پہنچانے کی توفیق دے۔