محسن نقوی کا شاہین چوک انڈر پاس پراجیکٹ کا دورہ

 

اسلام آباد: وفاقی وزیر داخلہ محسن نقوی نے آج صبح مارگلہ روڈ پر زیر تعمیر شاہین چوک انڈر پاس پراجیکٹ کا دورہ کیا اور پراجیکٹ کی جاری تعمیراتی سرگرمیوں کا تفصیلی جائزہ لیا۔

محسن نقوی نے دوران دورہ متعلقہ حکام کو ہدایت کی کہ پراجیکٹ کو بروقت اور اعلیٰ معیار کے مطابق مکمل کیا جائے۔ انہوں نے پراجیکٹ کی جلد تکمیل کے لیے ورک فورس میں اضافے کا بھی حکم دیا۔ وزیر داخلہ کا کہنا تھا کہ انڈر پاس کی تکمیل سے مارگلہ روڈ پر روزانہ سفر کرنے والے ہزاروں شہریوں کو ٹریفک جام سے نجات ملے گی اور علاقے کے تعلیمی اداروں کے طلبہ کو آمد و رفت میں سہولت فراہم ہوگی۔

چیئرمین سی ڈی اے، محمد علی رندھاوا نے بریفنگ میں بتایا کہ پراجیکٹ کے 85 گارڈر نصب کیے جا چکے ہیں، پری کاسٹ پلینگ مکمل ہو چکی ہے، اور ریٹیننگ وال و ریمپ کی تعمیر پر کام جاری ہے۔ انہوں نے کہا کہ منصوبہ ٹائم لائن کے مطابق آگے بڑھ رہا ہے اور مقررہ مدت میں مکمل کر لیا جائے گا۔