وانا کیڈٹ کالج حملہ، 115 افراد کو بحفاظت ریسکیو کر لیا گیا

پشاور: وانا کیڈٹ کالج پر حملہ کے واقعہ میں سیکیورٹی فورسز نے 115 افراد کو بحفاظت ریسکیو کر لیا۔

سیکیورٹی ذرائع نے بتایا کہ کیڈٹ کالج پر حملے کے وقت 525 کیڈٹس سمیت تقریباً 650 افراد موجود تھے، کیڈٹ کالج میں موجود 3 افغان خوارجین کو کالج کی ایک مخصوص عمارت تک محدود کر دیا گیا ہے، سکیورٹی فورسز نے علاقے کو گھیرے میں لے رکھا ہے۔

سیکیورٹی ذرائع نے یہ بھی بتایا کہ جس عمارت میں افغان خوارج موجود ہیں، وہ کیڈٹس کی رہائشی عمارتوں سے کافی فاصلے پر واقع ہے، اب تک تمام کیڈٹ محفوظ ہیں، کیڈٹس کی جانوں کے تحفظ کو مدنظر رکھتے ہوئے آپریشن نہایت احتیاط سے جاری ہے۔

بتایا گیا ہے کہ کالج کی حدود سے کیڈٹس کو نکالنے کا عمل بتدریج جاری ہے، اس وقت بھی کالج کے اندر تقریباً 535 افراد موجود ہیں، وانا کیڈٹ کالج میں موجود 3 افغان خوارجیوں کے خلاف آپریشن پوری شدت سے جاری ہے۔

سیکیورٹی ذرائع نے بتایا کہ افغان خوارجیوں نے کالج کے مرکزی گیٹ پر بارود سے بھری گاڑی ٹکرا دی تھی، دھماکے سے کالج کا مرکزی دروازہ مکمل طور پر منہدم ہو گیا، جبکہ قریبی عمارتوں کو بھی نقصان پہنچا۔

پاک فوج کے جوانوں نے فوری اور بہادری سے کارروائی کرتے ہوئے دو خوارجیوں کو موقع پر ہی جہنم واصل کر دیا تھا، معصوم قبائلی بچوں پر حملہ کرنے والے دہشتگردوں کا اسلام سے کوئی تعلق نہیں۔

سکیورٹی ذرائع نے کہا کہ دہشتگردوں کے مکمل خاتمے تک سکیورٹی فورسز کا آپریشن جاری رہے گا۔