سینیٹ سے منظور شدہ آئینی ترمیم آج قومی اسمبلی سے بھی منظور ہونے کا امکان

اسلام آباد: 27 ویں آئینی ترمیم کی آج قومی اسمبلی سے منظوری کا امکان ہے، جس کے بعد وفاقی آئینی عدالت کے قیام کے لیے عملی اقدامات شروع کیے جائیں گے۔

ذرائع کے مطابق قومی اسمبلی میں گزشتہ روز سے 27 ویں آئینی ترمیم پر بحث جاری ہے اور حکومت پرامید ہے کہ شام تک ایوان سے ترمیم کی منظوری حاصل کر لی جائے گی۔

ترمیم کی منظوری کے بعد بل صدر مملکت کے پاس بھیجا جائے گا، جس پر دستخط ہوتے ہی یہ ترمیم آئینِ پاکستان کا حصہ بن جائے گی۔

ذرائع کا کہنا ہے کہ اگر قومی اسمبلی آج ترمیم منظور کر لیتی ہے تو وفاقی آئینی عدالت کے ججز کل حلف لے سکتے ہیں اور عدالت عملی طور پر قائم ہو جائے گی۔

واضح رہے کہ 27 ویں آئینی ترمیم کے تحت صدر مملکت وزیراعظم کی ایڈوائس پر وفاقی آئینی عدالت کے ججوں کا تقرر کریں گے، اور سینیٹ سے یہ بل پہلے ہی منظور ہو چکا ہے۔