کراچی میں وقتی ٹریفک کی مشکلات، نتائج جلد نظر آئیں گے:شرجیل میمن

کراچی: سندھ کے سینئر وزیر شرجیل انعام میمن نے کہا ہے کہ کراچی میں جاری ترقیاتی منصوبے شہری سہولت اور مستقبل کی پائیدار ترقی کے لیے اہم ہیں، اور عوام سے تعاون کی اپیل کی ہے۔

انہوں نے کہا کہ کے فور منصوبہ عوام سے کیے گئے وعدے کے مطابق صاف اور وافر پانی فراہم کرے گا، اور عزیز بھٹی پارک سے اردو یونیورسٹی تک پانی کی پائپ لائن بچھائی جا رہی ہے تاکہ شہریوں کو سہولت ملے۔

وزیر نے اعتراف کیا کہ وقتی طور پر ٹریفک کی مشکلات ہیں، لیکن یہ مستقل حل کی طرف پیشرفت ہے۔ انہوں نے کہا کہ کے فور، ریڈ لائن اور دیگر منصوبے سندھ حکومت کے وژن کا حصہ ہیں اور ان کا مقصد کراچی کو جدید اور سہولیات سے آراستہ شہر میں تبدیل کرنا ہے۔

شرجیل میمن نے یقین دلایا کہ تمام منصوبوں کی تعمیراتی رفتار تیز کی گئی ہے اور جہاں بھی عوامی مشکلات ہیں، انہیں حل کیا جا رہا ہے۔ سندھ حکومت عوامی خدمت کے جذبے سے کام کر رہی ہے اور بہت جلد کراچی کے شہری ان منصوبوں کے مثبت نتائج خود محسوس کریں گے۔