27 ویں آئینی ترمیم کا نیا متن آج سینیٹ میں پیش، اجلاس صبح 11 بجے طلب

اسلام آباد ،27 ویں آئینی ترمیم کا نیا متن آج سینیٹ میں منظوری کے لیے پیش کیا جائے گا۔ سینیٹ کا اجلاس صبح 11 بجے طلب کیا گیا ہے۔

وفاقی کابینہ کا اجلاس بھی آج دوپہر کو منعقد ہوگا جس میں کابینہ آئینی ترامیم کی روشنی میں قوانین میں تبدیلیوں کی منظوری دے گی۔

گزشتہ روز 27 ویں آئینی ترمیم قومی اسمبلی میں دو تہائی اکثریت سے منظور کی گئی تھی۔ اپوزیشن نے بل کی کاپیاں پھاڑ دی اور اسپیکر ڈائس کے سامنے احتجاج کرتے ہوئے کارروائی کا بائیکاٹ کیا۔ ترمیم کی منظوری کے لیے حکومت کے پاس 234 ارکان موجود تھے، جبکہ جے یو آئی ف نے مخالفت میں ووٹ دیا۔

قومی اسمبلی میں ترمیم میں 8 نئی ترامیم شامل کی گئی ہیں۔ حکومت نے تجاویز کے تحت آرٹیکل 6 کی کلاز 2 میں تبدیلی کی ہے، جس کے مطابق سنگین غداری کا عمل کسی بھی عدالت کے ذریعے جائز قرار نہیں دیا جا سکے گا، اور کلاز 2 میں ہائی کورٹ، سپریم کورٹ کے ساتھ آئینی عدالت کا لفظ بھی شامل کیا گیا ہے۔

مزید برآں، موجودہ چیف جسٹس کو عہدے کی مدت پوری ہونے تک چیف جسٹس پاکستان کہا جائے گا، اور اس کے بعد چیف جسٹس سپریم کورٹ اور چیف جسٹس وفاقی آئینی عدالت میں سے سینئر ترین جج کو چیف جسٹس پاکستان کا عہدہ ملے گا۔