خودکش دھماکے کے بعد جوڈیشل کمپلیکس آج دوبارہ کھول دیا گیا

اسلام آباد: وفاقی دارالحکومت میں کچہری میں ہونے والے خودکش دھماکے کے بعد آج جوڈیشل کمپلیکس دوبارہ کھول دیا گیا اور معمول کی سرگرمیاں بحال ہو گئی ہیں۔

دنیا کے مطابق فیڈرل جوڈیشل کمپلیکس میں وکلا اور سائلین کی بڑی تعداد معمول کے مطابق پیش ہونے کے لیے پہنچ چکی ہے۔ اس موقع پر سکیورٹی کے انتہائی سخت انتظامات کیے گئے ہیں اور ہر آنے والے شخص کی مکمل جانچ پڑتال کی جا رہی ہے۔

انتظامیہ کے مطابق وکلا کے کلرکس کو آفیشل کارڈ دکھانے کے بعد ہی اندر داخلے کی اجازت دی جا رہی ہے، جبکہ سائلین کو تفصیلی تلاشی اور ذاتی معلومات درج کروانے کے بعد کچہری میں داخل ہونے دیا جا رہا ہے۔

اسلام آباد کچہری میں خودکش دھماکہ کا معاملہ،خودکش دھماکے کے بعد آج فیڈرل جوڈیشل کمپلیکس کو کھول دیا گیا ،وکلاء اور سائلین کی بڑی تعداد کچہری پہنچ گئی ،ضلعی کچہری میں سیکورٹی کے سخت انتظامات،وکلاء کے کلرکس کو آفیشل کارڈ دکھانے کے بعد داخلے کی اجازت ،سائلین کو تلاشی اور تفصیلات درج… pic.twitter.com/7R8R2ou5R1

— Abdul Rauf Bazmi (@RaufBazmi) November 13, 2025

واضح رہے کہ سکیورٹی اداروں نے دھماکے کے مقام سے تمام شواہد اکٹھے کر لیے ہیں۔ دوسری جانب وکلا برادری نے سانحے کے خلاف 13 اور 14 نومبر کو دو روزہ ہڑتال کا اعلان کیا ہے اور ان دنوں عدالتی کارروائی کا بائیکاٹ کیا جائے گا۔

ادھر فیملی کورٹس میں قائم ڈے کیئر سینٹر کو مزید چند روز کے لیے بند رکھنے کا فیصلہ کیا گیا ہے تاکہ حفاظتی اقدامات کو مزید مؤثر بنایا جا سکے۔