لاہور دنیا کے سب سے آلودہ شہروں میں دوسرے نمبر پر برقرار

 

لاہور: باغوں کا شہر لاہور دنیا کے آلودہ ترین شہروں میں آج بھی دوسرے نمبر پر ہے۔ ماحولیاتی ویب سائٹ کے مطابق شہر میں سموگ کی اوسط شرح 429 ریکارڈ کی گئی ہے۔ شہر کے مختلف علاقوں میں فضائی معیار کچھ یوں ہے: راوی روڈ 1198، لوئر مال 810 اور ایف سی کالج کے اطراف 706۔

پاکستان میں سب سے زیادہ آلودہ شہر گوجرانوالہ ہے جہاں اے کیو آئی 593 تک پہنچ گیا، جبکہ فیصل آباد میں 365 اور ملتان میں 299 ریکارڈ کیا گیا۔ پشاور کا اے کیو آئی 172 رہا۔ عالمی سطح پر بھارتی دارالحکومت نئی دہلی سب سے زیادہ آلودہ شہر ہے، جہاں اے کیو آئی 702 تک پہنچ گیا۔

ماہرین صحت نے شہریوں کو ماسک پہننے، غیر ضروری باہر نکلنے سے گریز کرنے اور گھروں میں ایئر پیوریفائر استعمال کرنے کی ہدایت کی ہے۔ ماحولیاتی ماہرین کا کہنا ہے کہ فصلوں کی باقیات جلانے، ٹریفک کے دباؤ اور صنعتی اخراج کے باعث لاہور کی فضا شدید آلودگی کا شکار ہے۔