کوئٹہ میں چینی کی فی کلو قیمت 230 روپے تک پہنچ گئی

کوئٹہ میں چینی کی فی کلو قیمت 230 روپے تک پہنچ گئی ہے، جو ملک کے دیگر بڑے شہروں کے مقابلے میں سب سے زیادہ ہے۔ کراچی، لاہور اور پشاور میں چینی کی قیمتیں 190 سے 200 روپے فی کلو کے درمیان دستیاب ہیں۔

وفاقی حکومت نے شوگر سیکٹر کو مکمل طور پر ڈی ریگولیٹ کرنے کا فیصلہ کر لیا ہے۔ اس سلسلے میں خصوصی کمیٹی کی سفارشات وزیراعظم کو پیش کی جائیں گی۔ وفاقی وزیر غذائی تحفظ رانا تنویر کا کہنا ہے کہ مارکیٹ فورس ہی فیصلہ کرے گی کہ چینی درآمد کی جائے یا برآمد۔

پنجاب میں 41 میں سے 27 شوگر ملز نے کرشنگ کا آغاز کر دیا ہے، جبکہ باقی 14 ملز جنہوں نے ابھی تک کرشنگ شروع نہیں کی، ان کے خلاف ایکشن پلان تیار کیا گیا ہے۔ حکومت نے نگرانی کے لیے ٹیمیں بھی تشکیل دی ہیں۔ کین کمشنر کے مطابق، جو مل کرشنگ شروع نہیں کرے گی اس پر روزانہ 10 لاکھ روپے جرمانہ عائد کیا جائے گا۔