خیبر پختونخوا میں سکیورٹی فورسز کی کارروائی، 15 دہشت گرد ہلاک

 

خیبر پختونخوا میں سکیورٹی فورسز نے کارروائی کرتے ہوئے بھارتی حمایت یافتہ گروہ فتنہ الخوارج کے 15 دہشت گرد ہلاک کر دیے ہیں۔

ذرائع کے مطابق 15 اور 16 نومبر کو دو الگ الگ کارروائیوں میں دہشت گرد مارے گئے۔ پہلی کارروائی ضلع ڈیرہ اسماعیل خان کے علاقے کلاچی میں خفیہ اطلاعات کی بنیاد پر کی گئی، جہاں دہشت گردوں کی موجودگی کی اطلاع موصول ہوئی تھی۔ اس آپریشن کے دوران 10 دہشت گرد ہلاک ہوئے، جن میں گروہ کا سرکردہ کمانڈر عالم محسود بھی شامل تھا۔

دوسری کارروائی شمالی وزیرستان کے علاقے دتاخیل میں کی گئی، جس میں سیکیورٹی فورسز نے مزید 5 دہشت گردوں کو ہلاک کیا۔ علاقے میں کلیئرنس اور سینیٹائزیشن کے اقدامات جاری ہیں تاکہ کسی بھی باقی ماندہ دہشت گرد کو ختم کیا جا سکے۔

سیکیورٹی فورسز اور قانون نافذ کرنے والے ادارے وفاقی ایپکس کمیٹی کی منظور شدہ حکمت عملی "عزمِ استحکام” کے تحت انسداد دہشت گردی کی کارروائی پوری طاقت کے ساتھ جاری رکھیں گے۔