گورکھپور ناکے پردھرنا ختم،عمران خان کی بہنیں رہا

راولپنڈی میں اڈیالہ جیل کے قریب گورکھپور ناکے پر پولیس نے کارروائی کرتے ہوئے دھرنا ختم کر دیا اور پاکستان تحریک انصاف کے بانی عمران خان کی بہنیں علیمہ خان، نورین نیازی اور عظمیٰ خان سمیت دیگر کارکنوں کو رہا کر دیا۔ ذرائع کے مطابق علیمہ خان نے اڈیالہ روڈ پر دھرنا ختم کرنے سے انکار کر دیا تھا، جس کے بعد پولیس نے آپریشن کرتے ہوئے 8 سے 10 کارکنوں کو تحویل میں لے کر قیدی وین میں منتقل کیا۔ دھرنے کے دوران نورین نیازی کی طبیعت بھی خراب ہوئی تھی۔ پولیس نے بعد ازاں تمام افراد کو چکری انٹرچینج پر رہا کیا۔ پولیس نے اڈیالہ جیل جانے والے راستے کو بند کر رکھا تھا اور عمران خان سے کسی بھی رہنما یا فیملی ممبر کو ملاقات کی اجازت نہیں دی گئی۔ دھرنے کے شرکا کو راستہ خالی کرنے کی درخواست کی گئی تھی، تاہم مذاکرات ناکام رہے اور پولیس نے سڑک پر پانی کا چھڑکاؤ بھی کیا، جس کے بعد دھرنا ختم کرایا گیا۔