آزاد کشمیر اور گلگت بلتستان میں 100 جدید آئی ٹی مراکز قائم

 

مظفرآباد: اسپیشل کمیونیکیشن آرگنائزیشن (ایس سی او) نے آزاد جموں و کشمیر اور گلگت بلتستان میں 100 جدید آئی ٹی مراکز قائم کر کے ڈیجیٹل انقلاب کی بنیاد رکھی ہے۔

پاکستان کی عسکری قیادت اور ڈی جی ایس سی او کی وژنری قیادت میں آزاد کشمیر ترقی کے نئے دور میں داخل ہو گیا ہے۔ ایس سی او کے منصوبے مظفرآباد، باغ، بھمبر، ڈڈیال، کوٹلی، میرپور، راولاکوٹ اور ہجیرہ کے نوجوانوں کو استفادہ فراہم کر رہے ہیں۔

سافٹ ویئر ٹیکنالوجی پارکس اور فری لانسنگ ہب نوجوانوں کی معاشی اور ٹیکنالوجیکل خود مختاری کے لیے اہم کردار ادا کر رہے ہیں۔ 49 دور دراز علاقوں میں قائم فری لانسنگ ہب نے نوجوانوں کے لیے روزگار اور ہنر کے نئے مواقع پیدا کیے ہیں۔

مظفرآباد میں پاکستان کا پہلا خواتین سافٹ ویئر ٹیکنالوجی پارک خواتین کے بااختیار ہونے کی علامت بن گیا ہے۔ ایس سی او نے خصوصی افراد کے لیے فری لانسنگ ہب کے قیام اور مفت خصوصی گاڑی کی سہولت فراہم کی ہے، جو ادارے کی سماجی شمولیت کا عملی ثبوت ہے۔

سافٹ ویئر پارکس اور آئی ٹی ہبز میں جدید سہولیات، تیز رفتار انٹرنیٹ اور 24 گھنٹے بجلی کی فراہمی یقینی بنائی گئی ہے۔ آزاد کشمیر میں 400 سے زائد نوجوان براہِ راست ایس سی او کے ترقیاتی منصوبوں سے مستفید ہو رہے ہیں جبکہ 500 سے زیادہ کامیاب فری لانسرز ملکی معیشت کو مضبوط بنانے میں کردار ادا کر رہے ہیں۔

ایس سی او منصوبوں سے 20 ملین ڈالر کی آمدن حاصل ہوئی ہے، جس سے پاکستان کی ڈیجیٹل خود انحصاری کے نئے دور کا آغاز ہو گیا ہے۔