ایف سی ہیڈکوارٹرز پر حملہ قابل مذمت،خوارج کا خاتمہ ترجیح ہے:صدر و وزیراعظم

اسلام آباد: صدر آصف علی زرداری اور وزیراعظم محمد شہباز شریف نے پشاور میں فیڈرل کانسٹیبلری (ایف سی) ہیڈکوارٹرز پر دہشت گردوں کے حملے کی شدید مذمت کی ہے۔ انہوں نے کہا کہ سکیورٹی فورسز کی بروقت کارروائی نے بڑے نقصان سے بچا لیا۔

صدرِ مملکت آصف علی زرداری نے فتنہ الخوارج کے حملے کی مذمت کرتے ہوئے شہداء کے لواحقین سے دلی ہمدردی اور زخمیوں کی جلد صحت یابی کے لیے دعا کی۔ صدر نے کہا کہ دہشت گردوں کا یہ حملہ بیرونی پشت پناہی میں سرگرم خارجی عناصر کی بزدلانہ کارروائی ہے اور وطنِ عزیز سے خوارج کی دہشت گردی کا مکمل خاتمہ اولین ترجیح ہے۔ انہوں نے سکیورٹی فورسز اور پولیس کی جرات مندانہ کارروائی کو بھی خراج تحسین پیش کیا۔

وزیراعظم شہباز شریف نے زخمیوں کو فوری طبی امداد فراہم کرنے کی ہدایت کی اور کہا کہ واقعے کے ذمہ داران کی جلد شناخت کر کے کیفر کردار تک پہنچایا جائے گا۔ وزیراعظم نے کہا کہ حکومت ملک سے دہشت گردی کے مکمل خاتمے کے لیے پرعزم ہے اور پاکستان کی سالمیت پر حملہ کرنے والے دہشت گردوں کے عزائم کو ناکام بنائیں گے۔

واضح رہے کہ پشاور میں ایف سی ہیڈکوارٹرز پر تین دہشت گردوں نے حملہ کیا۔ ایک خودکش بمبار گیٹ پر دھماکے میں ہلاک ہوا جبکہ دو دیگر حملہ آوروں کو ایف سی جوانوں نے فوری کارروائی کرتے ہوئے ہلاک کر دیا۔

وفاقی وزیر داخلہ رانا ثناء اللہ نے کہا کہ ایف سی کے جری جوانوں نے بہادری سے حملے کو ناکام بنایا اور جام شہادت نوش کرنے والے تین اہلکاروں کو خراج عقیدت پیش کیا۔ زخمیوں کو بہترین طبی سہولیات فراہم کی جائیں گی۔

—