عمران خان کی 9 مئی سمیت دیگر مقدمات میں گرفتاری روک دی گئی

اسلام آباد کی ایڈیشنل ڈسٹرکٹ اینڈ سیشن کورٹ نے بانی پاکستان تحریکِ انصاف (پی ٹی آئی) کے خلاف 9 مئی سمیت دیگر 5 مقدمات میں گرفتاری سے روک دیتے ہوئے اگلی سماعت میں انہیں عدالت میں یا ویڈیولنک کے ذریعے پیش کرنے کی ہدایت کر دی۔

ایڈیشنل ڈسٹرکٹ اینڈ سیشن جج محمد افضل مجوکہ نے سماعت کی، جس میں بانی پی ٹی آئی کی عدم موجودگی کے باعث ضمانت کی درخواستوں پر دلائل نہ ہوسکے اور سماعت 23 دسمبر تک ملتوی کردی گئی۔ عدالت نے بانی پی ٹی آئی اور بشریٰ بی بی کی ضمانت قبل از گرفتاری میں بھی توسیع کی۔

خیال رہے کہ بانی پی ٹی آئی کے خلاف 9 مئی کے واقعات، اقدام قتل اور مبینہ جعلی رسیدوں سمیت متعدد مقدمات زیر سماعت ہیں، جبکہ بشریٰ بی بی کے خلاف بھی جعلی رسیدیں جمع کرانے کا مقدمہ درج ہے۔