پنجاب میں بے گھر لوگوں کو مفت پلاٹ دینے کی سکیم باضابطہ شروع

بے گھر لوگوں کیلئے پاکستان کا پہلا اور منفرداپنی زمین، اپناگھرپروگرام کا آغاز کر دیا گیا۔پاکستان مسلم لیگ(ن)کے صدر محمد نواز شریف نے وزیراعلیٰ مریم نوازشریف کی درخواست پر پنجاب میں اپنی زمین، اپنا گھرپروگرام کا افتتاح اور قرعہ اندازی کا آغاز کیا۔اس موقع پروزیراعلیٰ مریم نواز شریف بھی موجود تھیں۔

محمد نوازشریف نے ڈیجیٹل ٹچ کے ذریعے سکیم کا باضابطہ آغاز کیا۔انہوں نے اپنی زمین، اپناگھر کی ڈیجیٹل قرعہ اندازی کا آغازبھی کیا۔قرعہ اندازی کے بعد وزیراعلیٰ مریم نواز شریف نے اٹک کی خاتون رخسانہ بی بی کو خود فون کرکے پلاٹ نکلنے پر مبارکباد پیش کی۔قائد مسلم لیگ(ن)محمد نواز شریف نے رخسانہ بی بی کو ٹیلی فون پر مبارکباد دی اورکہا کہ مبارک ہو،قرعہ اندازی میں مفت پلاٹ نکل آیا ہے۔رخسانہ بی بی نے میاں نواز شریف اور وزیراعلی مریم نواز شریف کوبہت سی دعائیں دیں۔
وزیراعلیٰ نے بہاولپور کی تحصیل منڈی یزمان کی میرومائی کا پلاٹ نکلنے پر انہیںبھی فون کیا اور محمد نواز شریف سے بات چیت کرائی۔میرو مائی کے شوہر رمیش لال قائد مسلم لیگ ن محمد نواز شریف اور وزیراعلی مریم نواز شریف کا فون آنے پر خوشی سے نہال ہو گئے۔ نواز شریف نے رمیش لال سے بات چیت کرتے ہوئے کہا کہ مجھے جانتے ہیں؟۔رمیش لال نے کہا کہ آپ ہمارے سب سے بڑے قومی لیڈر ہیں۔

اس موقع پروزیراعلی مریم نواز شریف نے بتایا کہ تین مرلہ کا مفت پلاٹ حاصل کرنے والے گھر بنانے کیلئے 15لاکھ قرض حاصل کر سکتے ہیں۔یہ قرض نو سال میں 14ہزار ماہانہ آسان قسط سے ادا کرنا ہے۔ مریم نواز شریف نے کہا کہ کھوکھلے نعرے نہیں وعدوں کی حقیقی تعبیر پیش کررہے ہیں۔

صوبائی وزیر ہائوسنگ بلال یسین نے بریفنگ دیتے ہوئے بتایا کہ پنجاب بھر کے 19اضلاع کی 23ہائوسنگ سکیموں میں 2ہزار افراد کو رہائشی پلاٹ مل گئے۔جہلم میں 730، قصور میں 388، فیصل آباد257، لودھراں میں 219نادار افراد کو پلاٹ مل گئے۔
ضلع اوکاڑہ کے 130لیہ55، بھکر52، ساہیوال کی 33اور سرگودھا کے 25افراد کو پہلے مرحلے میں پلاٹ ملے ہیں۔ضلع خوشاب میں 24،بہاولنگر20، منڈی بہاالدین 17، راجن پور میں 15اور اٹک میں 11خوش نصیب پلاٹ کے حقدارٹھہرے۔ گجرات8، بہاولپور7، جھنگ اور وہاڑی میں چار چار اور چنیوٹ کے 2 درخواست دہندگان کو پلاٹ مل گئے۔اپنی زمین، اپنا گھر پروگرام میں شفافیت یقینی بنانے کے لئے فول پروف طریقہ کار اپنا یا گیا۔ 4لاکھ 83ہزار سے زائد افراد نے رجسٹریشن کرالی۔

صوبائی وزیرکے مطابق پہلے فیز کے لئے2 لاکھ 57ہزار سے زائد درخواستیں موصول ہوئیں۔سکیم کے لئے اپلائی کرنے والوں کی نادرا ر ڈسٹرکٹ فیلڈ سٹاف کے ذریعے سکریننگ اور تصدیق کرائی گئی۔اسکروٹنی کمیٹی نے 18ہزار 308درخواست دہندگان کو قرعہ اندازی کا اہل قرار دیا۔صوبہ بھر میں 18لاکھ سے زائد لوگوں نے اپنی چھت، اپنا گھر ایپ استعمال کی، 9لاکھ 70ہزار افراد رجسٹرڈہوئے۔اپنی چھت، اپنا گھرپراجیکٹ کے تحت ایک لاکھ 18ہزار لوگوں کو 145ارب روپے کے قرض مل چکے ہیں۔