گندم کوٹہ کیس میں سندھ ہائی کورٹ کا فیصلہ کالعدم قرار

اسلام آباد: وفاقی آئینی عدالت نے گندم کوٹہ کیس میں اہم حکم جاری کرتے ہوئے سندھ ہائی کورٹ کے فیصلے کو کالعدم قرار دے دیا اور سندھ حکومت کی اپیل منظور کر لی۔

جسٹس امین الدین خان کی سربراہی میں تین رکنی بینچ نے سماعت کے دوران کہا کہ گندم کی پالیسی بنانا ایگزیکٹو کا اختیار ہے۔ سماعت میں ایڈیشنل ایڈووکیٹ جنرل سندھ سبطین محمود نے موقف اختیار کیا کہ سندھ ہائی کورٹ کی گائیڈ لائنز آئین کے تحت نہیں تھیں، جبکہ ایڈیشنل اٹارنی جنرل منور دگل نے عدالت کو بتایا کہ پالیسی بنانے کا اختیار حکومت کے پاس ہے۔

جسٹس علی باقر نجفی نے ریمارکس دیے کہ پالیسی ایگزیکٹو بنا کر اس کا اعلان کرتے ہیں۔ اس فیصلے کے بعد سندھ حکومت کی اپیل منظور کی گئی اور سندھ ہائی کورٹ کا سابقہ حکم کالعدم قرار پایا۔

واضح رہے کہ فلور مل مالکان گندم کوٹہ کے حصول کے لیے سندھ ہائی کورٹ سے رجوع کر چکے تھے۔