پشاور:بورڈ بازار میں فائرنگ سےقاری عزت اللہ کمسن بیٹے سمیت جاں بحق

پشاور: پشاور کے تھانہ پشتہ خرہ کی حدود بورڈ بازار میں عالم دین قاری عزت اللہ اور ان کے کم سن بیٹے سمیت جاں بحق، جبکہ دوسرا بیٹا زخمی ہو گیا۔

پولیس کے مطابق قاری عزت اللہ نماز جمعہ کی ادائیگی کے بعد اپنے دو بیٹوں کے ہمراہ موٹرکار میں گھر جا رہے تھے کہ بورڈ بازار میں موٹرسائیکل سوار افراد نے ان پر فائرنگ کر دی۔ فائرنگ کے نتیجے میں قاری عزت اللہ اور بیٹا علی جاں بحق ہو گئے جبکہ بیٹا مرتضیٰ زخمی ہوا۔ لاشوں اور زخمی کو فوری طور پر ہسپتال منتقل کر دیا گیا، جہاں زخمی کو طبی امداد دی جا رہی ہے۔

پولیس کا کہنا ہے کہ موٹرسائیکل سوار افراد کی اندھا دھند فائرنگ سے علاقے میں خوف و ہراس پھیل گیا۔ ایس پی کینٹ احتراز خان پولیس نفری سمیت جائے وقوعہ پہنچے اور اہم شواہد اکٹھے کر لیے گئے۔ قریبی علاقوں میں نصب سی سی ٹی وی کیمروں کی ریکارڈنگ حاصل کرکے نامعلوم افراد کے خلاف مقدمہ درج کر لیا گیا ہے۔ پولیس نے واقعے کا ٹارگٹ کلنگ سمیت دیگر پہلوؤں پر تفتیش کا آغاز کر دیا ہے۔