محسن نقوی کا اسلام آباد کے 3 بڑے پراجیکٹس کا دورہ

 

اسلام آباد — وفاقی وزیر داخلہ محسن نقوی نے ٹی چوک فلائی اوور، شاہین چوک انڈر پاس اور فیض آباد انٹرچینج کے منصوبوں کا دورہ کیا اور جاری تعمیراتی سرگرمیوں کا معائنہ کرتے ہوئے ان منصوبوں پر پیشرفت پر اطمینان کا اظہار کیا۔

وزیر داخلہ نے ہدایت کی کہ فیض آباد انٹرچینج پر ٹریفک روانی کو مزید بہتر بنانے کے لیے لوپ ون اور لوپ ٹو کو تین لین کیا جائے، اور منصوبوں کی خوبصورتی بڑھانے کے لیے دونوں اطراف لینڈ اسکیپنگ اور لائٹس لگائی جائیں۔

محسن نقوی نے کہا کہ منصوبوں کو جلد از جلد مکمل کرنے کے لیے تمام وسائل بروئے کار لائے جائیں، تاکہ ٹریفک روانی میں بہتری آئے، ٹریفک دباؤ کم ہو اور شہریوں کو آمدورفت میں سہولت حاصل ہو۔ انہوں نے مزید کہا کہ ٹی چوک فلائی اوور سے جڑواں شہروں اور پنجاب سے آنے والے مسافر بھی مستفید ہوں گے۔

بریفنگ کے دوران بتایا گیا کہ ٹی چوک فلائی اوور کا تقریباً 80 فیصد کام مکمل ہوچکا ہے اور یہ دسمبر کے شروع میں کھول دیا جائے گا۔ شاہین چوک انڈر پاس کے 70 گرڈرز کی لانچنگ مکمل ہوچکی ہے اور باقی گرڈرز کا کام جلد مکمل کیا جائے گا۔ منصوبے کے ریمپ ون اور ریمپ ٹو کا 100 فیصد کام بھی مکمل ہوچکا ہے۔

اس موقع پر ممبران سی ڈی اے، ڈپٹی کمشنر، ایڈیشنل ڈپٹی کمشنر اور دیگر افسران بھی موجود تھے۔