ملک کے بیشتر علاقوں میں موسم سرد رہنے کا امکان ہے،محکمہ موسمیات

 

اسلام آباد: محکمہ موسمیات نے ملک کے بیشتر علاقوں میں موسم کے حوالے سے خبردار کر دیا ہے۔ محکمہ کے مطابق میدانی علاقوں میں موسم سرد اور خشک رہے گا جبکہ پہاڑی علاقوں میں صبح اور رات کے اوقات میں شدید سردی رہنے کا امکان ہے۔

پنجاب اور خیبر پختونخوا کے میدانی علاقوں میں دھند اور اسموگ پڑنے کا بھی امکان ہے۔ ملک میں سب سے کم درجہ حرارت اسکردو میں منفی 10 اور گلگت بلتستان و قلات میں منفی 6 ریکارڈ کیا گیا۔

محکمہ موسمیات کے مطابق آئندہ دو روز کے دوران بالائی علاقوں میں رات کے درجہ حرارت میں مزید کمی متوقع ہے۔

محکمہ موسمیات نے پانچ دسمبر سے گلگت بلتستان، بالائی خیبر پختونخوا اور کشمیر میں تیز ہواؤں کے ساتھ بارش اور پہاڑوں پر برفباری کا امکان ظاہر کیا ہے۔ چھ دسمبر کو یہی علاقوں میں بارش اور برفباری متوقع ہے جبکہ سات دسمبر کو صرف گلگت بلتستان میں برفباری کی توقع ہے۔