فیلڈ مارشل سے سعودی بری افواج کے کمانڈر لیفٹیننٹ جنرل فہد بن سعود الجہانی کی ملاقات

راولپندی: سعودی بری افواج کے کمانڈر لیفٹیننٹ جنرل فہد بن سعود الجہانی نے جی ایچ کیو کا دورہ کیا اور فیلڈ مارشل عاصم منیر سے ملاقات کی، جی ایچ کیو پہنچنے پر معزز مہمان کو گارڈ آف آنر پیش کیا گیا۔

پاک فوج کے شعبہ تعلقات عامہ آئی ایس پی آر کے مطابق ملاقات کے دوران باہمی دلچسپی کے امور، علاقائی سلامتی اور دوطرفہ دفاعی تعاون کو بڑھانے کے طریقوں پر تبادلہ خیال کیا گیا۔ دونوں اطراف نے پاکستان کی مسلح افواج اور مملکت سعودی عرب کے درمیان دیرینہ اور برادرانہ تعلقات کو مزید مستحکم کرنے کے عزم کا اعادہ کیا۔

آئی ایس پی آر کے مطابق فیلڈ مارشل عاصم منیرنے دونوں ممالک کے درمیان مضبوط دفاعی تعاون پر اطمینان کا اظہار کیا اور تربیت، صلاحیت سازی اور انٹیلی جنس شیئرنگ میں مسلسل تعاون کی ضرورت پر زور دیا۔

آئی ایس پی آر کے مطابق کمانڈر آر ایس ایل ایف نے پاک فوج کی پیشہ ورانہ مہارت کا اعتراف کیا اور علاقائی امن اور استحکام میں پاکستان کے مثبت کردار کو سراہا۔