نیپا واقعہ:ایس ایس پی ایسٹ اور ڈپٹی کمشنر کو عہدوں سے ہٹا دیا گیا

 

نیپا چورنگی واقعے کے بعد انتظامی سطح پر اہم تبدیلیاں کی گئی ہیں، جن کے تحت ایس ایس پی ایسٹ ڈاکٹر فرخ رضا اور ڈپٹی کمشنر ایسٹ ابرار احمد جعفر کو ان کے عہدوں سے ہٹا دیا گیا ہے۔ اس سلسلے میں حکومت کی جانب سے باقاعدہ نوٹیفکیشن بھی جاری کردیا گیا ہے۔

جاری کیے گئے نوٹیفکیشن کے مطابق ڈپٹی کمشنر ایسٹ ابرار احمد جعفر کو فوری طور پر محکمہ سروسز میں رپورٹ کرنے کی ہدایت کی گئی ہے، جبکہ ڈپٹی کمشنر ملیر کو اضافی طور پر ڈپٹی کمشنر ایسٹ کا چارج دے دیا گیا ہے۔

ادھر آئی جی سندھ غلام نبی میمن نے بھی پولیس افسران سے متعلق اقدامات کرتے ہوئے ایس ایس پی ایسٹ ڈاکٹر فرخ رضا کو عہدے سے ہٹا کر انہیں سینٹرل پولیس آفس رپورٹ کرنے کا حکم دیا ہے۔ اسی سلسلے میں ڈی ایس پی نیوٹاؤن محمد معین اور کانسٹیبل سید عامر حسین کو معطل کرکے انہیں بھی سی پی او رپورٹ کرنے کی ہدایت کی گئی ہے۔

اس سے قبل گلشن اقبال میں کمسن بچے کے کھلے مین ہول میں گر کر جاں بحق ہونے کے واقعے پر کے ایم سی، ڈی ایم سی، واٹر بورڈ اور اسسٹنٹ کمشنر سمیت مختلف محکموں کے افسران کو بھی معطل کیا جاچکا ہے۔ محکمہ بلدیات سندھ نے معطلی کے نوٹیفکیشن جاری کیے تھے۔

معطل کیے گئے افسران میں سینئر ڈائریکٹر میونسپل سروسز عمران راجپوت، ٹی ایم سی گلشن اقبال کے اسسٹنٹ انجینئر راشد فیاض، کراچی واٹر اینڈ سیوریج کارپوریشن کے ایگزیکٹو انجینئر وقار احمد، اسسٹنٹ کمشنر گلشن اقبال عامر علی شاہ اور مختیارکار سلمان فارسی شامل ہیں۔

یہ تمام کارروائیاں وزیراعلیٰ سندھ مراد علی شاہ کی ہدایات پر عمل میں لائی گئیں۔