کرغز صدر کے اعزاز میں وزیراعظم ہاؤس میں استقبالیہ، گارڈ آف آنر پیش

 

اسلام آباد: کرغزستان کے صدر صادر ژاپاروف کے اعزاز میں وزیراعظم ہاؤس میں پروقار استقبالیہ تقریب کا انعقاد کیا گیا۔ وزیراعظم شہباز شریف نے معزز مہمان کا پرتپاک استقبال کیا اور دونوں رہنماؤں نے خیرسگالی کے جذبات کا تبادلہ کیا۔ اس موقع پر دونوں ممالک کے قومی ترانے بھی بجائے گئے۔

صدر ژاپاروف کو مسلح افواج کے چاق و چوبند دستے کی جانب سے گارڈ آف آنر پیش کیا گیا اور معزز مہمان نے اس کا معائنہ بھی کیا۔ تقریب کے دوران دونوں رہنماؤں نے اپنے وفد کے ارکان کا تعارف کرایا اور صدر ژاپاروف نے وزیراعظم ہاؤس کے احاطے میں ایک پودا بھی لگایا۔

یہ صدر ژاپاروف کا پاکستان کا پہلا سرکاری دورہ ہے۔ معزز مہمان صدر آصف علی زرداری سے بھی ملاقات کریں گے، جبکہ دونوں ممالک کے وفود کی سطح پر بات چیت اور کرغزستان-پاکستان بزنس فورم میں خطاب بھی متوقع ہے۔

اس موقع پر متعدد اہم معاہدوں اور مفاہتمی یادداشتوں پر دستخط کرنے کا بھی شیڈول ہے، جس سے دونوں ممالک کے تعلقات کو مزید مضبوط بنانے کی توقع ہے۔