کمرشل ایریاز میں گندگی پھیلانے والے قانون کے شکنجے میں آئیں گے

لاہور: پنجاب حکومت نے صوبے میں صفائی کے نظام کو بہتر بنانے کے لیے گندگی پھیلانے والوں پر جرمانے عائد کرنے کا فیصلہ کیا ہے۔

وزیراعلیٰ پنجاب مریم نواز کی زیر صدارت ستھرا پنجاب کے حوالے سے اجلاس ہوا، جس دوران ویسٹ ٹو ویلیو پروجیکٹ کے لیے وسط جنوری تک جامع پلان طلب کیا گیا۔ اجلاس میں بتایا گیا کہ صوبے بھر میں ستھرا پنجاب پر عوام کی طرف سے مثبت فیڈ بیک آ رہا ہے۔ گاڑیوں کی چیکنگ کے لیے وہیکل ٹریکنگ مینجمنٹ سسٹم اور لائیو کنٹینر مانیٹرنگ کا عمل جاری ہے، جبکہ تنخواہوں اور ادائیگی کے نظام کو ڈیجیٹلائز کر کے شفافیت کو یقینی بنایا گیا ہے۔

وزیراعلیٰ مریم نواز نے کہا کہ صفائی کا اتنا بڑا نظام کسی معجزے سے کم نہیں، اور صفر سے آغاز کے بعد وقت کے ساتھ ستھرا پنجاب پروجیکٹ میں بہتری لائی جا رہی ہے۔ انہوں نے کہا کہ شہروں اور دیہات میں صفائی کا جامع نظام برسوں پہلے بننا چاہیے تھا۔

اجلاس میں یہ بھی فیصلہ کیا گیا کہ پنجاب میں کمرشل ایریاز اور سڑکوں پر کوڑا کرکٹ پھیلانے والے قانون کے شکنجے میں آئیں گے اور جرمانے کا سامنا کریں گے۔ اس کے علاوہ، صوبے میں صفائی والی گاڑیاں ماحول دوست الیکٹرک وہیکلز ہوں گی اور کوڑے کرکٹ سے توانائی پیدا کرنے کے اقدامات بھی کیے جائیں گے۔