پاک ،ایران’آئی ٹی آئی ٹرین ‘‘ جلد بحال کرنے پر اتفاق

اسلام آباد: پاک ،ایران تعلقات میں نئے باب کا اضافہ ، ’’آئی ٹی آئی ٹرین ‘‘ جلد بحال کرنے پر اتفاق ہو گیا ۔

تفصیلات کے مطابق پاکستان اور ایران نے دوطرفہ تجارتی اور سفارتی تعلقات میں ایک نئے باب کا اضافہ کرتے ہوئے ’’استنبول-تہران-اسلام آباد (ITI) مال بردار ٹرین‘‘ کو اسی سال دوبارہ بحال کرنے پر اتفاق کیا ہے۔

یہ اہم فیصلہ وفاقی وزیر ریلوے محمد حنیف عباسی اور پاکستان میں تعینات ایرانی سفیر ڈاکٹر رضا امیری مقدم کے درمیان ہونے والی اعلیٰ سطحی ملاقات میں کیا گیا۔وزارتِ ریلوے میں ہونے والی اس ملاقات میں ایرانی کمرشل قونصلر  کمالی مقدم بھی شریک تھیں۔

دونوں رہنماؤں نے پاک-ایران برادرانہ تعلقات پر اطمینان کا اظہار کرتے ہوئے مستقبل میں باہمی تعاون کو مزید مستحکم کرنے پر اتفاق کیا۔

وفاقی وزیر محمد حنیف عباسی نے کہا کہ ریل کے ذریعے تجارت میں اضافہ نہ صرف پاکستان ریلوے کے ریونیو کو بڑھائے گا بلکہ یہ ملکی معیشت کے استحکام کے لیے بھی ناگزیر ہے۔ ہم خطے کو ریلوے نیٹ ورک کے ذریعے جوڑ کر پاکستان کو تجارتی راہداری کا مرکز بنانا چاہتے ہیں۔

ملاقات کے دوران ایرانی سفیر نے وزیر ریلوے کو ایران کے سرکاری دورے کی دعوت دی، جسے قبول کرتے ہوئے محمد حنیف عباسی نےقبول کیا۔