پنجاب حکومت نے اینٹی سموگ پلان مزید سخت کرنے کا فیصلہ کر لیا

 

لاہور: شمال مغربی ہواؤں کے باعث درآمد شدہ فضائی آلودگی میں اضافے کے پیش نظر پنجاب حکومت نے شہریوں کو بروقت آگاہی فراہم کرنے اور اینٹی سموگ پلان مزید سخت کرنے کا فیصلہ کیا ہے۔

وزیراعلیٰ پنجاب مریم نواز کی ہدایات کے مطابق تمام متعلقہ ادارے 24/7 فیلڈ میں متحرک ہیں اور فضائی آلودگی کے سدباب کے لیے سائنسی بنیادوں پر اقدامات کیے جا رہے ہیں۔ صنعتی شہروں سے آنے والی آلودگی کی سائنٹیفک میپنگ کے ذریعے مکمل ریکارڈ مرتب کیا جا رہا ہے جبکہ حکومتی اقدامات سے آئندہ دنوں میں واضح بہتری کی توقع ظاہر کی گئی ہے۔

محکمہ ماحولیات کے مطابق شمال مغربی ہواؤں کے باعث آلودگی میں اضافہ ضرور ہوا ہے، تاہم حکومتی ریگولیشنز میں کسی قسم کی نرمی نہیں برتی جا رہی۔ فصلوں کی باقیات جلانے کی روک تھام کے لیے ڈرون سرویلنس اور گراؤنڈ ٹیموں کی کارروائیاں مزید تیز کر دی گئی ہیں۔

ریئل ٹائم ڈیٹا شیئرنگ، وارننگ سسٹم اور فوری رسپانس یونٹس کو مزید مضبوط بنایا گیا ہے، جبکہ سموگ کنٹرول مشینری، واٹر باؤزرز اور انسپیکشن ٹیمیں لاہور میں ہائی الرٹ ہیں۔

حکومت نے شہریوں، خصوصاً حساس افراد کو ہدایت کی ہے کہ غیر ضروری طور پر باہر نکلنے سے گریز کریں، ماسک کا استعمال بڑھائیں، پانی زیادہ پئیں اور سانس میں تکلیف کی صورت میں فوری قریبی ہسپتال سے رجوع کریں۔

سینئر صوبائی وزیر مریم اورنگزیب نے کہا کہ پنجاب حکومت خطے میں سب سے جامع اینٹی اسموگ پلان پر عملدرآمد کر رہی ہے اور عوامی تعاون سے صورتحال مزید بہتر ہو گی۔