بلوچستان میں شدید سردی کی لہر،محکمہ موسمیات کی 24 گھنٹے کی پیشگوئی

 محکمہ موسمیات نے بلوچستان کے لیے اگلے 24 گھنٹوں کے دوران موسم کی تفصیلی پیشگوئی جاری کر دی ہے۔ پیشگوئی کے مطابق صوبے کے بیشتر اضلاع میں موسم خشک اور شدید سرد رہے گا، جبکہ شمالی اضلاع میں صبح اور رات کے اوقات میں شدید سردی کی لہر جاری رہے گی۔

کوئٹہ سمیت شمال مغربی اضلاع میں موسم زیادہ تر ابر آلود رہے گا، اور کوئٹہ، زیارت، چمن، پشین، قلعہ عبد اللہ، قلعہ سیف اللہ اور ان کے گردونواح میں چند مقامات پر ہلکی بارش اور پہاڑوں پر ہلکی برفباری کا امکان ہے۔ اس صورتحال کے باعث پہاڑی علاقوں میں مزید سردی کا خدشہ ہے، جس سے مسافروں اور مقامی آبادی کو احتیاط کی ضرورت ہے۔

محکمہ موسمیات کے مطابق آج صبح کوئٹہ میں درجہ حرارت صفر، قلات اور زیارت میں منفی 2، ژوب میں 3، سبی میں 9، تربت میں 14، نوکنڈی میں 9 اور چمن میں 4 ڈگری ریکارڈ کیا گیا۔ بلوچستان کے ساحلی علاقے گوادر میں کم سے کم درجہ حرارت 18 اور جیوانی میں 12 ڈگری ریکارڈ ہوا۔

محکمہ موسمیات نے شہریوں کو مشورہ دیا ہے کہ سرد موسم میں گرم لباس پہنیں اور خاص طور پر بچوں اور بزرگوں کی حفاظت کو یقینی بنائیں۔