پنجا ب میں حکومتی خرچ پر کینسر اور دل کے علاج،مفت سرجری کا منصوبہ منظور

پنجاب میں کارڈیک اور کینسر مریضوں کے لئے کارڈ متعارف کرانے کا فیصلہ کیاگیا۔وزیراعلی مریم نواز شریف نے منظوری دے دی۔

وزیراعلی مریم نواز شریف کی زیرصدارت سپیشلائزڈ ہیلتھ کیئر اینڈ میڈیکل ایجوکیشن کے حوالے سے خصوصی اجلاس منعقد ہوا۔اس موقع پر کینسر اور کارڈیک سرجری کے لئے خصوصی کارڈ پراجیکٹ پر بریفنگ دی گئی۔اس موقع پر پنجاب میں وزیراعلی سپیشل اینیشیٹو برائے کینسر پیشنٹ کارڈ متعارف کرانے کے بارے میں بھی بریفنگ دی گئی۔ پنجاب میں کینسر اور دل کے عارضہ میں مبتلا افراد کے علاج کا مکمل خرچ حکومت ادا کرے گی۔ اجلاس میں بتایا گیا کہ ہر مریض سی ایم اسپیشل اینیشیٹو کارڈ کے ذریعے 10 لاکھ روپے تک کے علاج کی سہولت حاصل کرے گا۔ پہلے مرحلے میں 45ہزار مریض نئے سی ایم اسپیشل اینیشیٹو کارڈ سے مستفید ہو ں گے۔ چیف منسٹر کارڈیک سرجری پروگرام کارڈ کے ذریعے مفت سرجری کی جائے گی۔

وزیراعلی مریم نوازشریف نے اسٹروک /فالج کے بروقت علاج کے لئے پروگرام پلان طلب کر لیا ۔17جنوری تک نواز شریف انسٹیٹیوٹ آف کینسر ٹریٹمنٹ اینڈ ریسرچ کے اوپی ڈی بلاک کو فعال،نواز شریف انسٹیٹیوٹ آف کارڈیالوجی سرگودھا 31جنوری تک فعال کرنے کی ڈیڈ لائن مقرر کر دی گئی۔

سیکرٹری سپیشلائزڈ ہیلتھ کیئر اینڈ میڈیکل ایجوکیشن نے وزیراعلی کو تفصیلی بریفنگ دی۔ بریفنگ میں بتایا گیا کہ انسٹیٹیوٹ آف کینسر ٹریٹمنٹ اینڈریسرچ کے بورڈ آف گورنر نے پہلے مرحلے میں 219اسامیوں پر بھرتی کی منظوری دے دی۔ انسٹیٹیوٹ آف کارڈیالوجی سرگودھا میں او پی ڈی، آئی پی ڈی،ایمرجنسی،پتھالویالوجی اور یڈیالوجی 31 جنوری تک مکمل نکشنل کر دیئے جائیں گے۔ نواز شریف انسٹیٹیوٹ آف کارڈیالوجی سرگودھاکے بورڈ آف گورنر نے پہلے فیز میں 258اسامیوں پر بھرتی کی منظوری دی گئی۔اجلاس میں بتایا گیا کہ جناح انسٹیٹیوٹ آف کارڈیالوجی 15فروری سے فنکشنل ہوگا۔ بورڈ آف گورنر نے جناح انسٹیٹیوٹ آف کارڈیالوجی کے لئے 1104اسامیوں پر بھرتی کی منظوری دے دی۔

اجلاس کو بریفنگ میں بتایا گیا کہ پنجاب کے 57بڑے ہسپتالوں کی اوپی ڈی میں ڈھائی کروڑ اور ایمرجنسی میں ایک کروڑ62لاکھ مریضوں کا علاج ہوا۔ پنجاب کے بڑے ہسپتالوں میں19ارب 90کروڑ روپے کی ادویات مہیا کی گئیں۔ وزیراعلی میڈیسن ہوم ڈیلیوری پروگرام کے تحت 537511مریضوں کو 480ملین روپے کی ادویات کی فراہمی کی گئی۔

بریفنگ میں مزید بتایا گیا کہ پنجاب کے سرکاری ہسپتالوں میں 11ماہ کے دوران 744430 سرجری، 475040 سی ٹی سکین، 150925ایم آر آئی سکین کی گئی۔ سرکاری ہسپتالوں میں امراض قلب کی نشاندہی کے لئے 105155انجیو گرافی اور 157950ایکو کارڈیوگرافی کی گئی۔سرکاری ہسپتالوں میں 12 لاکھ سے زائد الٹراسائونڈ اور 18لاکھ سے زائد ایکسرے کیے گئے۔ ڈیڑھ کروڑ سے زائد مریضوں کو پتھالوجی ڈائیگناسٹک ٹیسٹ کی سہولت مہیا کی گئی۔