پاکستان کو آئی ایم ایف کی طرف سے 1.3 ارب ڈالر کی اگلی قسط موصول

عالمی مالیاتی فنڈز (آئی ایم ایف) نے پاکستان کے لیے 1 ارب 30 کروڑ ڈالر قرضے کی اگلی قسط جاری کر دی ہے۔ وزارت خزانہ کے ذرائع کے مطابق اس میں تقریباً 1 ارب ڈالر آر ایف ایف پروگرام کی پہلی قسط اور 20 کروڑ ڈالر آر ایس ایف پروگرام کے تحت اضافی قسط شامل ہے۔

اسٹیٹ بینک نے بھی آئی ایم ایف سے قسط موصول ہونے کی تصدیق کر دی ہے۔ اس کے بعد پاکستان کو آئی ایف ایف اور آر ایس ایف پروگرامز کے تحت موصول ہونے والی مجموعی رقم 3.3 ارب ڈالر تک پہنچ گئی ہے۔

ذرائع نے بتایا کہ آئی ایم ایف کی جانب سے پالیسی ترجیحات میں میکرو اکنامک استحکام، پبلک فنانس اصلاحات اور مسابقت بڑھانے پر زور دیا گیا ہے۔ حالیہ تباہ کن سیلاب کے باوجود حکومت کی معاشی کارکردگی نے مالی و بیرونی شعبے میں استحکام برقرار رکھا ہے۔

واضح رہے کہ آئی ایم ایف کے ایگزیکٹو بورڈ نے واشنگٹن میں اجلاس کے دوران پاکستان کے لیے یہ قسط اور دوسرے اقتصادی جائزے کی بھی منظوری دی تھی۔