9 مئی عاصم منیر کی تعیناتی پلٹنے کا منصوبہ، فیض حمید شامل تھے، خواجہ آصف

وزیر دفاع خواجہ آصف کا کہنا ہے کہ 9 مئی موجودہ آرمی چیف سید عاصم منیر کی تعیناتی پلٹنے کا منصوبہ تھا جس میں فیض حمید شامل تھے، سابق آرمی چیف جنرل (ر) قمر جاوید باجوہ نے فیلڈ مارشل سید عاصم منیر کی تعیناتی رکوانے کے لیے نہ صرف دباؤ ڈالا بلکہ دھمکیاں بھی دیں، اور ابتدا میں فیض حمید کو آرمی چیف بنوانے کی کوشش کی۔

جیو نیوز کے پروگرام آج شاہ زیب خانزادہ کے ساتھ میں گفتگو کرتے ہوئے خواجہ آصف نے کہا کہ ماضی میں کبھی آرمی چیف کی تقرری کے حکومتی اختیار کو چیلنج نہیں کیا گیا، تاہم جنرل باجوہ نے اس عمل میں غیر معمولی مداخلت کی۔

وزیر دفاع کا کہنا تھا کہ جنرل باجوہ فیلڈ مارشل کی تعیناتی رکوانے کے لیے پہلے فیض حمید کا نام لائے، بعد ازاں دیگر نام بھی تجویز کیے۔ ان کے مطابق 9 مئی کے واقعات فیض حمید اور پی ٹی آئی کا مشترکہ منصوبہ تھے، جس کا مقصد فیلڈ مارشل عاصم منیر کی تعیناتی کو پلٹانا تھا۔

خواجہ آصف کا مزید کہنا تھا کہ 9 مئی کی منصوبہ بندی بانی پی ٹی آئی اکیلے نہیں کر سکتے تھے۔ فیض حمید کے خلاف مزید مقدمات بننے کی گنجائش موجود ہے، کیونکہ وہ ریٹائرمنٹ کے باوجود رابطوں میں تھے اور معاملات کی نبض ان کے ہاتھ میں تھی۔