پاک فوج ہر اندرونی و بیرونی چیلنج سے نمٹنے کے لیے تیار ہے:فیلڈ مارشل

گوجرانوالہ/سیالکوٹ: چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے کہا ہے کہ پاک فوج اندرونی و بیرونی چیلنجز، انتہاپسندانہ نظریات اور قومی استحکام کو نقصان پہنچانے والی تقسیم پسند قوتوں سے نمٹنے کے لیے مکمل طور پر تیار اور پرعزم ہے۔

پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے گوجرانوالہ اور سیالکوٹ گیریژن کا دورہ کیا، جہاں انہیں فارمیشن کی آپریشنل تیاریوں اور جنگی صلاحیتوں میں اضافے کے لیے کیے گئے اہم اقدامات پر تفصیلی بریفنگ دی گئی۔

آئی ایس پی آر کا کہنا ہے کہ فیلڈ مارشل نے فیلڈ ٹریننگ ایکسرسائز اور جدید سمیولیٹر ٹریننگ سہولت کا مشاہدہ کیا اور فارمیشن کے اعلیٰ پیشہ ورانہ معیار اور مجموعی تیاری کو سراہا۔ اس موقع پر انہوں نے جدید جنگی ماحول میں ٹیکنالوجی سے ہم آہنگی، حالات سے باخبر رہنے اور بروقت فیصلوں کی اہمیت پر زور دیا۔

فیلڈ مارشل سید عاصم منیر نے افسران اور جوانوں سے گفتگو کرتے ہوئے ان کے بلند حوصلے اور قومی سلامتی کے لیے غیر متزلزل عزم کی تعریف کی اور سخت، مقصد پر مبنی تربیت کی ضرورت پر زور دیا۔

آئی ایس پی آر کے مطابق گوجرانوالہ پہنچنے پر چیف آف آرمی اسٹاف و چیف آف ڈیفنس فورسز کا استقبال کور کمانڈر گوجرانوالہ نے کیا۔