پاکستان بار کونسل انتخابات،عاصمہ جہانگیر گروپ نے میدان مار لیا

پاکستان بار کونسل کے انتخابات میں پنجاب کی نشستوں کے غیر حتمی نتائج سامنے آ گئے ہیں۔ وفاقی وزیر قانون اعظم نذیر تارڑ کے مطابق پنجاب کی 11 میں سے 8 نشستوں پر عاصمہ جہانگیر گروپ نے کامیابی حاصل کر لی ہے، جبکہ 2 نشستیں حامد خان گروپ کے حصے میں آئی ہیں۔

غیر سرکاری نتائج کے مطابق حامد خان گروپ کے سلمان اکرم راجہ اور شفقت چوہان ممبر پاکستان بار کونسل منتخب ہوئے ہیں۔ دوسری جانب عاصمہ جہانگیر گروپ کے امیدوار اعظم نذیر تارڑ، احسن بھون، پیر مسعود چشتی، عامر سعید راں، طاہر ناصراللہ وڑائچ، حفیظ الرحمان چوہدری، ثاقب اکرم گوندل اور سید قلب حسن ممبر پاکستان بار کونسل منتخب قرار پائے ہیں۔

ذرائع کے مطابق پنجاب کی 11 میں سے 10 نشستوں کے نتائج موصول ہو چکے ہیں، جبکہ ایک نشست کا نتیجہ باقی ہے۔ کامیاب امیدواروں کا حتمی اور سرکاری اعلان 22 دسمبر کو کیا جائے گا۔