اسلام آباد:پنشن فنڈ میں کروڑوں روپے کی خردبرد،مرکزی ملزم گرفتار

اسلام آباد میں ایف آئی اے اینٹی کرپشن سرکل نے بڑی کارروائی کرتے ہوئے اسٹیٹ انجینئرنگ کارپوریشن مینجمنٹ کے پنشن فنڈ میں کروڑوں روپے کی مالی بے ضابطگی میں ملوث مرکزی ملزم طلحہ رسول کو گرفتار کر لیا ہے۔

ایف آئی اے حکام کے مطابق ملزم پر الزام ہے کہ اس نے چار کروڑ 61 لاکھ روپے سے زائد کے پنشن فنڈز میں خردبرد کی۔ ملزم کو اس وقت حراست میں لیا گیا جب اس کی ضمانتِ قبل از گرفتاری مسترد کر دی گئی۔

ایف آئی اے نے بتایا کہ اسٹیٹ انجینئرنگ کارپوریشن مینجمنٹ کی جانب سے موصول ہونے والی شکایت پر مقدمہ درج کیا گیا تھا، جس کی سماعت کے دوران اسپیشل جج سینٹرل-II اسلام آباد نے ملزم کی ضمانت خارج کر دی۔

ابتدائی تفتیش کے مطابق طلحہ رسول نے دیگر شریک ملزمان کے ساتھ مل کر نجی بینک کی بلیو ایریا برانچ سے جعلی بینک چیکس اور جعلی دستخطوں کے ذریعے پنشن فنڈز نکلوائے۔ حکام کا کہنا ہے کہ ملزم سے مزید تفتیش جاری ہے جبکہ کیس میں نامزد دیگر افراد کی گرفتاری کے لیے بھی چھاپے مارے جا رہے ہیں۔

ایف آئی اے حکام کے مطابق اس میگا کرپشن کیس میں ملوث تمام کرداروں کو قانون کے کٹہرے میں لایا جائے گا اور قومی خزانے کو نقصان پہنچانے والوں کے خلاف بلاامتیاز کارروائی جاری رہے گی۔