فیلڈ مارشل سید عاصم منیر کی لیبیا کے عسکری قائدین سے ملاقات،دفاعی تعاون بڑھانے پر اتفاق

 

راولپنڈی، پاک فوج کے سربراہ اور چیف آف ڈیفنس اسٹاف فیلڈ مارشل سید عاصم منیر نے لیبیا کے سرکاری دورے کے دوران لیبیا کی عرب مسلح افواج کے کمانڈر انچیف فیلڈ مارشل خلیفہ بلقاسم حفتر اور ڈپٹی چیف آف آرمی اسٹاف لیفٹیننٹ جنرل صدام خلیفہ حفتر سے ملاقات کی۔

 

آئی ایس پی آر کے مطابق لیبیا پہنچنے پر فیلڈ مارشل سید عاصم منیر کو لیبیا کی مسلح افواج کے چاق و چوبند دستے کی جانب سے گارڈ آف آنر پیش کیا گیا۔

 

ملاقات کے دوران باہمی دلچسپی کے امور، علاقائی سلامتی کی صورتحال اور دوطرفہ دفاعی و ملٹری ٹو ملٹری تعاون کو فروغ دینے کے طریقوں پر تفصیلی تبادلہ خیال کیا گیا۔

دونوں ممالک نے تربیت، صلاحیت سازی اور انسداد دہشت گردی کے شعبوں میں تعاون کی اہمیت پر زور دیا۔

 

 

فیلڈ مارشل سید عاصم منیر نے مشترکہ مفادات کی بنیاد پر لیبیا کے ساتھ دفاعی تعلقات کو مزید مضبوط بنانے کے لیے پاکستان کے عزم کا اعادہ کیا۔

اس موقع پر فیلڈ مارشل خلیفہ حفتر نے پاکستان کی مسلح افواج کی پیشہ ورانہ مہارت کو سراہتے ہوئے دونوں ممالک کے درمیان دفاعی تعاون کو وسعت دینے کی خواہش کا اظہار کیا۔