پاکستان انٹیلی جنس ایجنسی کی بڑی کارروائی،داعش خراسان کا ترجمان گرفتار

پاکستانی انٹیلی جنس اداروں نے ایک بڑی کامیابی حاصل کرتے ہوئے داعش خراسان (ISIS-K) کے ترجمان اور تنظیم کے آفیشل میڈیا وِنگ الاعظائم فاؤنڈیشن کے بانی دہشت گرد خارجی سلطان عزیز اعظّام کو گرفتار کر لیا ہے۔ سیکیورٹی ذرائع کے مطابق یہ کارروائی پاکستان کی انٹیلی جنس ایجنسی نے کی۔

الاعظائم فاؤنڈیشن کو داعش خراسان کی بھرتی اور پراپیگنڈا سرگرمیوں کا مرکزی نیٹ ورک سمجھا جاتا ہے۔ سلطان عزیز اعظّام کی گرفتاری کے بعد تنظیم کی میڈیا اور تشہیری سرگرمیاں بھی معطل ہو گئی ہیں۔ حالیہ عرصے میں پاکستانی حکام کی جانب سے داعش خراسان کے خلاف متعدد ہائی پروفائل گرفتاریاں کی گئی ہیں، جن میں سلطان عزیز اعظّام کی 16 مئی 2025 کو ہونے والی گرفتاری بھی شامل ہے۔

یہ انکشاف اقوامِ متحدہ کی اینالیٹیکل سپورٹ اینڈ سینکشنز مانیٹرنگ ٹیم کی سولہویں رپورٹ میں سامنے آیا ہے۔ رپورٹ کے مطابق پاکستان کی مؤثر کارروائیوں کے نتیجے میں داعش خراسان کے تنظیمی ڈھانچے کو عالمی سطح پر شدید کمزوری کا سامنا کرنا پڑا ہے، کئی منصوبہ بند دہشت گرد حملے ناکام بنائے گئے ہیں جبکہ تنظیم کے جنگجوؤں کی تعداد میں بھی نمایاں کمی واقع ہوئی ہے۔

رپورٹ میں مزید بتایا گیا ہے کہ اہم کمانڈرز اور نظریاتی رہنماؤں کو نیوٹرلائز کر دیا گیا ہے۔ مئی 2025 میں سلطان عزیز اعظّام اور سینئر رہنما ابو یاسر الترکی کی گرفتاری جیسے اقدامات کے باعث داعش خراسان کی آپریشنل صلاحیت میں واضح کمی آئی ہے، جبکہ ان کارروائیوں کے نتیجے میں “وائس آف خراسان” جیسے اہم پراپیگنڈا پلیٹ فارمز بھی غیر فعال ہو گئے ہیں۔