کراچی میں پولیس مقابلے،5 ڈاکو زخمی حالت میں گرفتار،ایک فرار

کراچی ،کراچی کے مختلف علاقوں میں مبینہ پولیس مقابلوں کے دوران پانچ مشتبہ ڈاکو زخمی حالت میں گرفتار ہوئے جبکہ ایک ملزم فرار ہونے میں کامیاب ہو گیا۔

تفصیلات کے مطابق تھانہ نیو کراچی کی حدود میں ڈگری کالج، سیکٹر 11-I کے قریب پولیس معمول کے گشت پر تھی کہ مشکوک موٹر سائیکل سوار افراد کو روکنے کی کوشش کی۔

ملزمان نے پولیس کو دیکھتے ہی فائرنگ شروع کر دی جس کے نتیجے میں تین ملزمان زخمی حالت میں گرفتار کر لیے گئے۔ گرفتار زخمی ملزمان میں شیر عالم ولد فیصل خان، محمد سعید عرف محمد ولد محمد یامین اور معصوم ولد سلیم شامل ہیں۔

پولیس نے ملزمان کے قبضے سے ایک 9 ایم ایم پستول، دو 30 بور پستول اور ایک 70 سی سی موٹر سائیکل برآمد کی۔ زخمی ملزمان کو فوری طور پر عباسی شہید اسپتال منتقل کر دیا گیا جبکہ مزید قانونی کارروائی کے لیے کرائم سین یونٹ کو طلب کیا گیا ہے۔

اسی دوران کراچی کے علاقے ملیر، ریڑی روڈ احسان گراؤنڈ کے قریب قائدآباد پولیس اور مسلح ڈاکوؤں کے درمیان فائرنگ کا تبادلہ ہوا۔ اس کارروائی میں ایک ملزم زخمی حالت میں گرفتار ہوا جبکہ اس کا ساتھی فرار ہونے میں کامیاب رہا۔

پولیس نے کہا ہے کہ گرفتار ملزمان کا کریمنل ریکارڈ جمع کیا جا رہا ہے اور انہیں جلد مزید قانونی کارروائی کے لیے پیش کیا جائے گا۔