پاکستان جنوری 2026 میں اپنا پہلا پانڈا بانڈ جاری کرے گا،وزارت خزانہ

اسلام آباد،وزارت خزانہ نے اعلان کیا ہے کہ پاکستان جنوری 2026 میں اپنا پہلا پانڈا بانڈ جاری کرے گا۔ وزیر خزانہ محمد اورنگزیب کی زیر صدارت اجلاس میں بتایا گیا کہ یہ بانڈ ایک منصوبہ بند پروگرام کا حصہ ہے جس کی کل مالیت تقریباً ایک ارب ڈالر تک ہو سکتی ہے۔

اجلاس میں بتایا گیا کہ ملٹی لیٹرل پارٹنرز کی منظوری پہلے ہی حاصل ہو چکی ہے جبکہ چینی ریگولیٹرز سے آخری منظوری جنوری کے اوائل میں متوقع ہے۔ ابتدائی بانڈ سے تقریباً 250 ملین ڈالر حاصل ہوں گے، جبکہ مزید اقساط ریگولیٹری منظوریوں کے بعد جاری کی جائیں گی۔

بانڈ یوآن میں جاری ہوگا اور چین کی آن شور مارکیٹ میں فروخت کیا جائے گا۔ یہ اقدام پاکستان کی وسیع تر قرض مینجمنٹ حکمت عملی کا حصہ ہے تاکہ آئی ایم ایف کے 7 ارب ڈالر پروگرام کے تحت معیشت کو مستحکم کیا جا سکے۔ وزارت خزانہ کے مطابق چینی ادارہ جاتی سرمایہ کاروں کے ساتھ تعلقات مثبت ہیں، جو حالیہ پالیسی اصلاحات کے بعد پاکستان کی میکرو اکنامک صورتحال میں اعتماد کی عکاسی کرتے ہیں۔