کراچی،شدید دھند،حد نگاہ متاثر،بین الاقوامی پروازیں دوسرے ایئرپورٹس پر منتقل

کراچی میں صبح کے وقت شدید دھند کے باعث حد نگاہ متاثر ہونے سے متعدد بین الاقوامی پروازوں کا رخ تبدیل کر دیا گیا۔ شہر کے مختلف علاقوں جیسے سرجانی ٹاؤن، سپر ہائی وے، سہراب گوٹھ، گلستان جوہر، آئی آئی چندریگر روڈ، کلفٹن اور ڈیفنس میں دھند چھائی رہی، جبکہ ایم نائن موٹروے پر حد نگاہ تقریباً صفر رہی۔ شہر کے دیگر علاقوں بشمول ناردرن بائی پاس، یونیورسٹی روڈ اور کریم آباد میں بھی دھند ریکارڈ کی گئی۔

محکمہ موسمیات کے مطابق آج شہر کا کم سے کم درجہ حرارت 17.5 ڈگری سینٹی گریڈ جبکہ زیادہ سے زیادہ درجہ حرارت 28 سے 30 ڈگری سینٹی گریڈ کے درمیان رہنے کا امکان ہے۔ آئندہ 24 گھنٹوں میں موسم زیادہ تر ابرآلود اور رات کے وقت خنک رہنے کی پیشگوئی کی گئی ہے۔

دھند کے باعث چھ بین الاقوامی پروازیں دیگر ایئرپورٹس پر منتقل کر دی گئی ہیں۔ پاکستان ایوی ایشن اتھارٹی کے ترجمان کے مطابق یہ پروازیں حفاظتی اقدامات کے تحت مسقط اور اسلام آباد منتقل کی گئیں۔ نجی ایئر لائن کی جدہ سے کراچی آنے والی پرواز بھی اسلام آباد روانہ کی گئی۔

ترجمان نے کہا کہ محدود حد نگاہ میں پروازوں کی منتقلی ایک معمولی حفاظتی اقدام ہے تاکہ مسافروں اور طیاروں کی حفاظت یقینی بنائی جا سکے۔