سولر صارفین کے لیے نیٹ میٹرنگ پالیسی میں تبدیلی

اسلام آباد: ملک میں سولر صارفین کے لیے نیٹ میٹرنگ پالیسی میں اہم تبدیلی کا فیصلہ کر لیا گیا ہے۔ نیپرا کے ذرائع کے مطابق نئی پالیسی کو "نیپرا سولر صارفین قوانین 2025” کا نام دیا گیا ہے اور وزارت توانائی نے اسٹیک ہولڈرز سے مشاورت کے بعد اس کی منظوری دے دی ہے۔

ذرائع کے مطابق نئی پالیسی کے تحت نیٹ میٹرنگ سے نیٹ بلنگ کا نظام متعارف کروایا جائے گا۔ سولر معاہدے کی مدت پہلے 7 سال تھی، جو اب 5 سال کر دی گئی ہے، اور سولر صارفین کو اضافی سرچارج کی جگہ فی یونٹ تبادلہ کی سہولت دی جائے گی۔ نئی سولر نیٹ بلنگ میں فی یونٹ قیمت تقریباً 11 روپے ہوگی۔

نیٹ میٹرنگ کے تحت پہلے صارفین 25 روپے 98 پیسے فی یونٹ کا فائدہ اٹھا سکتے تھے۔ نئی پالیسی کے مطابق آئندہ 25 کلو واٹ سے کم لوڈ کے لیے نیپرا سے لائسنس لینا لازم ہوگا، جب کہ پہلے گھریلو، صنعتی اور کمرشل صارفین کو 25 کلو واٹ تک لائسنس سے استثنیٰ حاصل تھا۔

نیپرا ذرائع کے مطابق وزارت توانائی، ڈسکوز اور نیپرا نے کئی ماہ تک مشاورت کے بعد یہ پراسیجر مکمل کیا ہے اور وزارت توانائی نے وفاقی حکومت کو بتایا ہے کہ نئی پالیسی کے بغیر نظام کو مؤثر طریقے سے چلانا ممکن نہیں۔ وزارت توانائی کے ترجمان نے کہا کہ سولر ٹیرف کا تعین نیپرا ریگولیٹرز کی ذمہ داری ہے اور صارفین کو اس سے زیادہ فرق نہیں پڑے گا۔ نئے نظام کے تحت نیٹ میٹرنگ سے نیٹ بلنگ کا اطلاق ہوگا۔