بھارت کیخلاف تاریخی فتح،انڈر19 ٹیم ٹرافی کےہمراہ وطن واپس پہنچ گئی

بھارت کے خلاف تاریخی فتح کے بعد پاکستان کی قومی انڈر 19 کرکٹ ٹیم ایشیا کپ ٹرافی کے ہمراہ وطن واپس پہنچ گئی، جہاں اسلام آباد ایئرپورٹ پر شاندار اور یادگار استقبال کیا گیا۔

انڈر 19 ایشیا کپ کے فائنل میں روایتی حریف بھارت کو بھاری مارجن سے شکست دینے والی پاکستانی ٹیم رات گئے اسلام آباد پہنچی۔ ایئرپورٹ پر شہریوں کی بڑی تعداد نے کھلاڑیوں کا پرتپاک استقبال کیا۔ فاتح کھلاڑیوں پر پھولوں کی پتیاں نچھاور کی گئیں، انہیں پھولوں کے ہار پہنائے گئے اور گلدستے پیش کیے گئے۔

پاکستان انڈر 19 ٹیم کا اسلام آباد انٹرنیشنل ایئرپورٹ پر شاندار استقبال۔

کھلاڑیوں اور سپورٹ سٹاف کا استقبال پی سی بی چیف اپریٹنگ افیسر سمیر احمد سید، ڈائریکٹر ہائی پرفارمنس عاقب جاوید اور دیگر پی سی بی حکام نے کیا۔

دبئی میں فائنل میں بھارت انڈر 19 کو شکست دینے کے بعد وطن واپسی۔… pic.twitter.com/tuS6ugggK0

— PCB Media (@TheRealPCBMedia) December 21, 2025

استقبال کے موقع پر ڈھول کی تھاپ پر رقص اور بھنگڑے ڈالے گئے جبکہ ایئرپورٹ کے باہر آتش بازی کا مظاہرہ بھی کیا گیا۔ فضا پاکستان زندہ باد کے نعروں سے گونجتی رہی اور شائقین نے نوجوان شاہینوں کی کامیابی پر بھرپور جوش و خروش کا اظہار کیا۔

 

یہ بھی پڑھیں :۔ انڈر 19 ایشیا کپ جیتنے والی پاکستانی ٹیم کیلیے بڑے انعام کا اعلان

 

پاکستان کرکٹ بورڈ کے چیف آپریٹنگ آفیسر سمیر احمد، ڈائریکٹر ہائی پرفارمنس عاقب جاوید سمیت دیگر پی سی بی حکام بھی ٹیم کے استقبال کے لیے موجود تھے۔ بعد ازاں تمام کھلاڑیوں کو وی آئی پی پروٹوکول کے تحت مقامی ہوٹل منتقل کیا گیا۔

 

انڈر 19 ایشیا کپ جیتنے پر وزیراعظم اور محسن نقوی کی ٹیم اور قوم کو مبارکباد

 

ادھر وزیراعظم شہباز شریف آج قومی انڈر 19 ٹیم کے کھلاڑیوں سے ملاقات کریں گے، جہاں ایشیا کپ جیتنے اور بھارت کو شکست دینے پر نوجوان کھلاڑیوں کی حوصلہ افزائی کی جائے گی۔

 

واضح رہے کہ فائنل میں پاکستان نے بھارت کو 191 رنز سے شکست دے کر ایشیا کپ اپنے نام کیا۔ پاکستان نے مقررہ 50 اوورز میں 8 وکٹوں کے نقصان پر 347 رنز اسکور کیے۔ سمیر منہاس نے شاندار بیٹنگ کا مظاہرہ کرتے ہوئے 113 گیندوں پر 17 چوکوں اور 9 چھکوں کی مدد سے 172 رنز کی دھواں دار اننگز کھیلی اور ٹورنامنٹ کے ٹاپ اسکورر رہے۔

348 رنز کے ہدف کے تعاقب میں بھارتی ٹیم 156 رنز پر آؤٹ ہو گئی۔ بھارت کی جانب سے دیوندرن نے 36 جبکہ سوریا ونشی نے 26 رنز بنائے۔

یہ پاکستان کا انڈر 19 ایشیا کپ میں دوسرا ٹائٹل ہے۔ اس سے قبل 2012 کے ایونٹ میں پاکستان اور بھارت مشترکہ طور پر چیمپئن قرار پائے تھے۔